Pu Denga khan BJP thawhpui a phal ka ring lo - Duhoma

Zoram Peoples Movement (ZPM) Legislature Party leader Lalduhoma chuan, MNF founder president Laldenga kha la dam se chuan, MNF-in BJP an thawhpui a phal a rin loh thu a sawi.

Nimina Sairanga ZPM leh Congress thláwp mipui candidate-te puala inkhawm buatsaihah thu sawiin Lalduhoma chuan, "Mizorama political party-te hi inbei chiam chiam ṭhin mah ila, issue azirin kan thawkho leh mai ṭhin. Tun ṭum thawh dunna hi MNF-te hian an hlauh em avangin sawiselna hrang hrang an zawng mek a ni. Kan thawkho hi pawi an ti tak zet," a ti.

Lalduhoma chuan, MP inthlan hnuhnung berah pawh MNF telin party pali an ṭang rual tih sawiin, "Tun inthlanah pawh thil duh loh tak kan nei a, mahnia sut zawh loh kan hlauh avangin Congress nen kan thawkho a ni," a ti a; an flag leh symbol-te chu ZPM leh Congress party-te'n ui em em mah se, ram, hnam leh sakhua himna atan inthlan lo awm tur atan an dahṭha tih a sawi.

A hun lai mil zela thu sawi ṭhin a nih thu sawiin Duhoma chuan, "Kan thusawite hi a issue azirte a ni a, issue lo la thleng tur atan kan sawi lo. Kan thusawi hlui thehdarh chiam chiamte hi inbeihna chi a ni lo," a ti.

Lalduhoma chuan, MP inthlan lo awm turah BJP-te'n MNF an puih leh ngei tur thu sawiin, "MLA inthlanah pawh Mizoram BJP-te an pui ṭha duh lo a, MNF an mawm thung zia chu tlang hriat a ni. MNF founder president Pu Laldenga kha la dam se, BJP thawhpui hi a duhin ka ring lo," a ti a; a mawiah Mizoram BJP-te'n candidate an neih ve leh ngei a rin thu a sawi.

Lalduhoma chuan, MNF Pre­sident-in Assembly House-a 'CAB an pass chuan MNF chu NDA aṭangin kan inhnûkdâwk mai ang,' a ti chu thil nuihzatthlak tak a nih thu a sawi a, "I motor hi a accident mai ang, a brake a fail a nia, an tih pawh a, 'Accident phawt se kan siamṭha leh mai ang' tih ang vel a ni. Kan ram, kan hnam leh kan sakhua himna atan MP leh MLA-ah mipui candidate-te hi vote vek turin ka sawm a che u" a ti.

ZPM Leader chuan, Lal­nghinglova Hmar beih a nihna ṭhin 'Football hmasawnna atan a thawh hlâwk avangin a la uiawm' tih chu thil lawmawm tak a nih thu sawiin, "Thil ropui zawk ti chhunzawm zel turin kan rawn chhawp chhuak a ni," a ti a; Lalnghinglova chu a naupang tawh lo a, amah pawh MP a nihin kum 35 chauh a nih thu a sawi a ni.