Lok Sabha inthlan tur hi BJP lamṭang leh BJP lamṭang ni lote indona a ni - Tetea Hmar

Nimin khan Sairang dawr­kâwnah Lok Sabha inthlanpui leh Aizawl West-I MLA bye-election awm tura Congress leh ZPM mipui candidate-te pualin vantlang inkhawm neih a ni a; MP candidate Lalnghinglova Hmar chuan, tun ṭuma Lok Sabha inthlan chu BJP lamṭang leh BJP lamṭang ni lote indona a nih thu leh, BJP chu paihthlak ngei a ṭul thu a sawi.

Vantlang inkhawm hi Sai­ranga MPF hruaitu Teresa Ro­thangpuii'n a kaihruai a; MP candidate Lalnghinglova Hmar chuan, "Tun ṭum MP inthlan hi BJP lamṭang leh BJP lamṭang lote indona a ni. BJP lamṭang lo lama bán phar turin Mizo mipuite duhsakna leh Congress leh ZPM mipui duhsakna te, neutral leh MNF party-a awm ngei ngeite duhsakna vangin Pathianin hnehna min chantir ngei ang tih ka ring a ni," a ti.

Lalnghinglova Hmar chuan, mi tuin emaw, 'KṬP ka ni a, Presbyterian chu ka ni lo,' ti se thil nuihzatthlak tak a nih tur thu sawiin, "BJP kan thláwp lo ti reng chunga NDA leh NEDA-a tel reng si hi MNF thiam inchantirna mai a ni a, thil nuihzatthlak mai a ni," a ti a; ṭawngkam thiama sawi mawi chi a ni lo tih a sawi.

BJP sorkar hnuaiah Hindu ni lote an chêp tial tial tih sawiin Tetea Hmar chuan, "Mizorama lo luh tum Zo hnahthlak, US citizenship nei tawh, LIKBK ṭhalai inkhawmpuia speaker tur pawh, Kristian programme a nih vangin BJP sorkar hian visa a pe duh lo. Hetiang ang hi tam tak an awm tawh. Kan sakhuana vangin nêkchêp kan ni der tawh. BJP an sorkar leh hi a hlauhawm em em a, BJP leh an lamṭangte hi i paihthla ngam ang u," a ti a; Mizo mipuite leh Aizawl West-I mipuite a sáwm a ni.

Aizawl West-I MLA bye-election-a mipui candidate Lal­buanga Sailo chuan, a khing­pui tur MNF candidate chu mihring mihrinnaa a tluk loh a ni tih a hriat thu sawiin, "Nimahsela, kan dinna pawl leh party-in khawi lam nge an hawi a, tute lamṭang nge kan nih tih ngaihtuah chuan, ZPM leh Congress party thlàwp mipui candidate ka ni te, hnam hnatlang hial neih phah ngaia min siamtu BJP lo mawngzawm tlattu MNF candidate ka ni lo erawh ka lawm hle," a ti a; BJP leh an sangawi zawnpui MNF candidate-te thlan tlin a hlauhawm thu a sawi.