Iron rod bûk dik hriatna tur chart tlangzarh

Central YMA leh All Mizoram Cement & Iron Rod Dealers Association (AMCIRDA)-te chuan thuchhuah siamin, iron rod bûk dik lo leh inbumna laka mipui an him theih nan a bûk dik tak hriat theihna tur chart an siam a, chart chu nimin khan an tlangzarh. Chart tár iron rod zuarte chu dàwr lo turin mipui an chah.

CYMA leh AMCIRDA thuchhuah chuan, uluk taka zirchian leh ngaihtuah a nih hnuah Mizorama iron rod (TMT bar) zuar tam zawkte'n quintal rate hisâpin an hralh ṭhin a, chu chu inbumna leh bûk dik loa hralh awlsam dan ber a nih avangin, mipuiin awlsam leh dik zawka iron rod bûk dik an lei theih nan weight chart an siam tih an tarlang a; "Weight chart hi iron rod zuar dawr zawng zawngah târ chhuah mek a nia, chart tar lo dawrte chu kal pêl turin kan inngen a ni," an ti.

Weight chart chu iron rod zuartute tana hekna tur awm miah lo a ni tih sawiin CYMA leh AMCIRDA chuan, "Mipuite'n dik leh hlâwk zawka iron rod an lei theihna tur a ni a, weight chart-ah hian rod size/suth hrang hrangte rih zawng tarlan a ni," an ti a; weight chart hmangin iron rod leitute'n a buk a dik leh dik loh an enfiah zel thei tih an sawi.

Iron rod bûk dik loa hralh chu Legal metrology Act, 2009 Chapter 5, Section 25 hmangin hrem theih a ni a, vawi khat mannaah Rs. 20,000 chawi theih niin, vawi hnih mannaah Rs. 50,000 chawi leh thla ruk thleng tân theih a ni.

Chart hman dan tur
# Iron rod leitute'n a tlâwn awm zat chhiar/hriat hmasak tur.
# Iron rod leitute'n cash memo/ receipt-ah a tlâwn zat ziah lantir tur.
# Iron rod lei rih zawng chu a tlâwn zatin sem (divide) tur a ni a, tlâwn khat rih zawng awlsam takin a hriat theih.
# Iron rod leitute'n weight chart nen en mil mai tawh tur a ni a, chart-a tarlan aia rit/zâng lutuk a nih chuan chart-a contact number tarlanah complaint theih a ni.