Aizawlah 'Fit Mizoram Run' buatsaih

Sports & Youth Service (SYS) department chuan nimin khan Aizawlah ram mipuite taksa hriselna ngai pawimawh tura infuihna hun atan 'Fit Mizoram Run' an buatsaih a, a khârna hun Lammualah an buatsaih.

Fit Mizorama Run-ah hian Chhangurkawn, Kulikawn leh Aizawl North College aṭangin mi eng emaw zat an tel a, Lammualah an intâwk khawm a ni. Lam­muala inkhawm buat­saih chu SYS director Zothanmawia'n a kaihruai a; khuallian SYS secretary H Lalengmawia chuan, hrisel turin taksa a ṭhat a ngai a, chu chu mihringte mamawh ber pakhat a nih thu sawiin, "Fit turin beih nasat a ngai a, fit lo tura awm erawh thil har a ni lo," a ti.

H Lalengmawia chuan, zunthlum leh thisen sangte hi khawthlang ho natna kan tih mai ṭhin a, tunah chuan Mizote natna tlángláwn tak a ni mek tih sawiin, "Naupang tê tê zunthlum vei an tam tawh em em. Exercise kan lak ṭhat a ngai a, ei leh in thlengin kan insûm a ngai," a ti a, ram mipui an hrisel ṭhat chuan Mizote chu hnam ropui tak an nih theih tur thu a sawi.

Fit Mizoram Run-ah hian Mizorama state level sport association hrang hrang te, college zirlai te, SYS department leh Mizoram State Sports Council-a thawkte an tel a, minister leh MLA ṭhenkhat an tlan ve bawk.