Hnam dang pakhat chet dan vangin Falkland Vengah buaina a chhuak

March 21, Ningani zan khan Falkland Venga mandir pêngah BRTF mi hnam dang pakhatin Mizo taxi driver Vanlalrawna a vuakthlûk avangin mipui thinrimin BRTF duty post ṭhenkhat an hâl a; taxi driver kutthlaktu BRTF hnathawk pakhat chu police-in an man.

Thu dawn danin, Ningani zan tìr lamah Pushpak School bula taxi chu BRTF camp aṭanga chhuak BRTF motor-in a sû a, taxi driver chu chhuakin, BRTF motor driver chu a ṭhâm a; an inkalsan hnua BRTF mi (Bimal niin an sawi) lêt leh chuan taxi driver leh a ṭhianpa chu a vaw ta mai a ni. Taxi driver hi Greenwood Hospital-ah lak nghal a ni a, enkawl mek a ni.

Thil thleng vang hian a bul hnaia awmte an inpun khawm a, BRTF duty post pawh an hâl a ni. Taxi driver kutthlaktu chu mipuiin an kut pek phût mah se, police leh khawtlang hruaitute'n an hum thei a, police kutah an hlan. Mipui pungkhawmte chu zanlai dar 12 velah an ṭîn darh a ni.

Falkland Veng Branch YMA president Vanlal­hmuaka'n Vanglaini palai zawhna chhanga a sawi danin, mipui thinrim dan an tumna lamah Falkland Veng YMA finance secretary PB Sangdingliana chu kutthlak a ni a, damdawi-in panpui ngai ni lo mah se, nimin lamah chuan a meng thei lo. Zemabawk lama YMA hruaitu Lalthanzauva pawh a lú-ah lunga vawm fuh a ni a, nikhaw hre loa awmin, Aizawl Civil Hospital-ah admit a ni a, nimin lamah chuan nikhua a hre ṭan niin an sawi.

Falkland Veng YMA Finance Secretary kut­thlaktu hi Lalvenhima nia hriat a ni a, ngawihbopui an tum lo nia thu dawn a ni bawk.