KHAWTHLIR
THISEN PE
Nimin khan Bethlehem Vengthlang Branch YMA-in Aizawl Civil Hospital-ah thisen unit 35 an pe a, replacement donation unit 42 a awm. Baptist Higher Secondary School NSS-in nimin leh Thawhṭanni khan Christian Hospital-ah unit 20 an pe a, Lunglei HSS NSS-in unit 12 an pe bawk. Champhai District Hospital-ah Adventist Youth Federation Champhai North Bialte'n March 26 aṭanga nimin thleng khan unit 23 an pe. Phawngpui Photographers' Association-in Lawngtlai District Hospital-ah nimin khan unit 10 an pe a; Saiha District Hospital-ah mimal pe an awm nual bawk.
HELPLINE
Mizoram Social Defence & Rehabilitation Board, Social Welfare & Tribal Affairs, Social Welfare department leh Mizoram Drug Users Forum-te chuan ruih theih thil kaihhnawiha harsatna nei tan taksa leh rilru lama an harsatna tawhte sawipuia ṭanpui theihna turin helpline an siam. Helpline number chu - 9862377185, 9862732289, 8729982033, 7085629481, 9862120717, 8974772691, 7005576775 leh 9436140870 te a ni.
DAMDAWI THLENG
Health Services joint director (Food & Drugs) Lalsawma hoin nimin khan Damdawi Zuar Association hruaitute an ṭhukhawm a, phai aṭangin damdawi a thlen belh a, stock a ṭhat hret hret thu tarlan a ni. Lalsawma'n Vanglaini a hrilh danin, damdawite chu Thawh- ṭanni khan truck phur hnih a thleng a, kawng lakah truck pathum a thang mek. Cold chain-a phurh ngai chi pawhin nimin khan Guwahati a chhuahsan a ni.
LEHKHA BEL TUR
Lunglei district-a village task force duty-te'n an lirtheiah lehkha - motor registration number ziahna leh village task force chairman emaw vice chairman emaw seal leh signature chuanna an bel tur a ni tih sorkar thuchhuahin a tarlang. Hei hi task force duty ni lo, duty-te lehkha ang lirtheia tár ve an awm theih avangin fimkhurna atana ruahman a ni.
HMANRUA SEM
Champhaia personal protective equipment (PPE) volunteer group chuan nimin khan Champhaia damdawi-in, quarantine centre, village task force leh police-te hnenah Covid-19 laka invenna hmanruate an sem. PPE Volunteer Group-ah hian puanṭhui thiam mi 42 awm in, hmai tuamna 1,265, PPE suit 205, cotton suit panga leh lukhum 16 an sem tawh a ni.