Thlai hralh dan tur sawiho
Commerce & Industries director J Hmingthanmawia hoin Thawhṭanni khan C&I directorate conference hallah sorkar mi pawimawhte an ṭhukhawm a, Aizawl mipuite'n ei leh bâr an tlâkchham loh nan leh thlai thartute'n ṭha taka thlai an hralh chhunzawm theih dan tur an sawiho a; mumal taka vegetable supply chain siam chhunzawm ṭha an ti.
Meeting chuan, Aizawl khaw pui chu zonal officer pakhat ṭheuh enkawlna hnuaiah zone-12 ah ṭhen an rél a; veng tina local task force aṭangin an veng bil mamawh (demand) la khawmin, zonal officer hnenah an thlen ang a, zonal officerte'n controlling room siam thara controlling officer-te hnenah an report leh ang.
Controlling officer pakhatin zone pathum zel an enkawl dawn a ni. State páwn aṭanga thlai lâk luhte chu mipui hnen a thlen hmain Covid-19 Medical Operational Team-te'n a him theih nan ruahmanna siam se, an ti a; thlai hnah leh thlai rahte mipui hnena hralh chhuahna man chungchangah, hlêp leh hloh awm loa kalpui an rél bawk. Meeting-ah hian Horticulture Director leh MIZOFED Chairman-te bakah, Horticulture, Commerce & Industries leh IPR officer te, Central YMA hruaitute leh Aizawl City Local Council Association hruaitute an tel a ni.