Mamit DC leh Karimganj DC inbia Kolasib DC Vairengteah dan a ni
Assam leh Mizoram ramri buai chungchangah Union Home Secretary hoa state pahnih Chief Secretary-te inbiakna kal zelah October 31, Inrinni khan Mamit DC leh Karimganj DC-te chu inbe tura tih an ni a, Kolasib DC leh Cachar DC-te pawh inbe tura tih an ni. Mamit DC leh Karimganj DC-te an inbiak laiin, Kolasib DC erawh chu Vairengte mipuite'n an dan avangin Cachar DC nen an inbe thei lo.
Mizorama lut tur bungruate Lailapur-ah dan mek a nih avangin Vairengte mipui chuan state pahnih thuneitute inbiak chu ṭha an ti lo a, chuvang chuan Kolasib DC Dr H Lalthlangliana'n inbiakna hmun tur Lailapur a pan tur chu Vairengteah an lo dang a ni.
Hun eng emaw chen an dan hnuah Vairengte SDO (Civil) pisaah khawtlang hruaitute nen an inbia a; khawtlang hruaitute chuan DC chu mipui pungkhawm paltlang luih tum lo turin an ngen.
Kolasib DC chu a kal luih hlauin Vairengte mipuite chu inṭhenin, kal khàn awm zawng zawngah an véng a; Bawrhsap chuan chawhnu dar 3:30 velah Vairengte chhuahsanin Kolasib a pan a, chumi hnuah mipui an ṭin.
Vanglaini palai zawhna chhangin Dr H Lalthlangliana chuan, kal luih a tum chuan thisen hial chhuak thei a nih avangin mipui ngenna anga kal loh mai ṭha zawka a hriat thu a sawi.
Vairengte mipui chuan resolution pathum an siam a; Cachar DC thupek anga NH kawngpuia lirthei dan mekte chhuah a nih hma loh chuan sorkar anga inbiakna neih ni tawh suh se, an ti. Mizoram leh Assam sorkarin inbiakna an nei dawn a nih pawhin Mizoram leh Assam huam chhung ni lo, state dang (neutral ground)-ah inbiak ni rawh se, tih leh, central sorkar hian duhsak bik neiin rorel tawh suh se, tihte an pass bawk.
Vairengte khawtlangin resolution an siamte chu Inrinni vêk khan Kolasib DC-in chief secretary Lalnunmawia Chuaungo hnenah a thawn nghal a ni.
Vanglaini palai zawhna chhangin Vairengte Joint VC chairman R Lalfamkima chuan, Lailapur-a lirthei dan chu Cachar DC-in a thuneihna hmang suala a tihtir ngei nia an hriat thu a sawi a, "Mizoram lam chuan Union Home Secretary hoa inbiakna zawmin lirthei kan chhuah a, Lailapur lama lirthei dan mek chu Assam lam mawhphurhna a ni," a ti.
R Lalfamkima chuan, sorkar laipuiin duhsak bik neiin ro a rél nia an hriat thu sawiin, "Mizoram sorkar pawhin thil thlengte central lamah an report ve reng chungin Assam sorkar nawr lui si loin, Mizoram sorkar zawk a nawr lui a, bultumtu leh buaina ṭan hmasa zawktu an ni," a ti a; Mizoram chuan MP nei tlemin, state tê ni mah se, India ramah a awm ve tho avangin rorelna dik a phu tih a sawi.
Ramri chungchangah tho hian Inrinni vêk khan Mamit DC Dr Lalrozama leh Karimganj DC Anbamuthan MP-te chu Ischabeel Tea Estate, Karimganj-ah an inbia. Mamit DC hi Mamit SP leh Mamit SDO leh, Kawrthah SDO leh DFO-te'n an ṭawiawm.
Sorkar thuchhuah tarlan danin, meeting-ah hian 'Ramria remna leh muanna a awm theihna turin thawhhona ṭha tak nei chungin hmalakna kalpui ni se' tih te, 'State pahnihte hian anmahni huam chhung ve ve buaina a awm lohna turin hma la se' tihte leh, 'Mamit leh Karimganj thuneitute'n motor veivakte pangngai taka an kal leh theihna turin enpuia hmalak ni se' tihte an pawm a ni.