Covid-19: Mizoram dinhmun Ni 2 chhungin hri vei 64 hmu

October 30, Zirtawpni khan Mizoramah Covid-19 vei mi 28 hmuh chhuah a ni a, October 31, Inrinni khan mi 34 hmuh chhuah a ni bawk. Inrinni leh nimin khan hripui laka fihlim tawh mi 15 chhuahtir an ni a; chhuak tawh zawng zawng mi 2,299 an ni.

Covid-19 vei October 30-a hmuh chhuahte chu - ZMC laboratory-a hmuh mi 25, TrueNAT-PCR hmanga hmuh mi pahnih leh Rapid Antigen Test (RAT) hmanga hmuh mi pakhat an ni. October 31-a hmuh chhuahte chu - ZMC-a hmuh mi 28 leh RAT hmanga hmuh mi paruk an ni a; TrueNAT-PCR hmanga endik zingah hripui vei an awm lo.

Inrinni khan hripui laka fihlîm tawh mi pasarih - SRH-ZMC aṭangin pali leh Chhiahtlang CCC aṭangin mi pathum an chhuak a; nimin khan mi pariat - SRH-ZMC aṭangin pali, Thenzawl CCC aṭangin pakhat leh Chhiahtlang CCC aṭangin pathum an chhuak bawk.

Mizoramah Covid-19 positive mi 2,756 hmuh chhuah tawh a ni a, mipa 2,132 leh hmeichhia 624 an ni. An zinga mi 2,299 (83.42%) chu chhuahtir an ni tawh a, mi pakhat (0.03%) thi tawhin, enkawl mek mi 456 (16.55%) an awm.

October 30 khan Mizoramah mi 1,158-te swab sample endik a ni a; ZMC-ah sample 755, district pariatah TrueNAT-PCR hmangin sample 220 leh RAT hmangin district pakuaah sample 183 endik a ni. October 31-ah ZMC-ah sample 1,221, TrueNAT hmangin district pakuaah sample 120, RAT hmangin district 11-ah sample 355, a vaiin sample 1,696 endik a ni bawk.

ZMC laboratory-ah October 30, Zirtawpni khan Covid-19 positive mi 25 hmuh chhuah niin, Aizawl district-a mi vek mipa 18 leh hmeichhia pasarih an ni a; Mizoram aṭanga tun hnaia rawn haw mi 13 leh Mizoram chhunga kái chhâwng mi 12 an ni.

Hripui vei hmuh zinga mipa pahnih, kum 29 leh 30 chu Zarkawta cheng ṭhin, state páwn aṭanga rawn lut, quarantine facility-a awm lai an ni a, symptom an nei lo.

SAI Hostel quarantine centre-a khung hran lai zingah hripui vei hmuh chhuah mi panga an awm a; Maubawka cheng mipa kum 16 leh 46 mite leh hmeichhia kum 45 mi te, Champhaia mipa kum 40 mi te, Ṭhuampui venga mipa kum 29-te chu tun hnaia Tripura aṭanga rawn hawte an ni a, symptom nei an awm lo.

Hripui vei zinga mi Kulikawna mipa kum 14 leh 28 chu Hmarkhawlian aṭanga haw, SAI Hostel-a khung hran lai, symptom nei lo an ni a; Ramthar Veng hmeichhia kum 27 mi pawh Assam aṭanga haw, SAI Hostel-a khung hran lai, symptom nei lo a ni.

Lengpui quarantine facility-a awm mek zingah Covid-19 vei CRPF mi mipa kum 30 hmuh a ni a, symptom nei lo a ni. Hetih lai hian, chanchin kimchang hriat loh BSF sipai kum 46 leh 47 mi hmuh chhuah a ni bawk. Mizoram chhunga káite dinhmun chiang zawk chu hmun dangah tarlan a ni.

TrueNAT-PCR hmangin Lunglei Civil Hospital-ah hripui vei BSF sipai kum 54 mi hmuh chhuah a ni a, tun hnaia Silchar aṭanga rawn lut, quarantine facility-a awm lai, symptom nei lo a ni. Mamit District Hospital-ah pawh Mamit Lungsira Agriculture department quarters-a khawsa mipa kum 58 hmuh chhuah a ni.

RAT hmanga Aizawla hmuh chhuah mi pakhat a awm a; Falkland Venga mipa kum 28, zin chhuah dawn vanga inenfiahtir a nih thu, sorkar thuchhuahin a tarlang.

October 31, Inrinni khan ZMC laboratory-ah hripui vei mi 28 hmuh chhuah a ni a, Aizawl district-a test vek, mipa 14 leh hmeichhia 14 niin, Mizoram chhunga kái mi 25 leh tun hnaia state páwn aṭanga rawn lut mi pathum an ni.

State páwn aṭanga rawn lutte chu - Thingsulthliaha inbun mek GVV Constructions hnuaia thawk mipa kum 32 mi te, Bethlehem Venga mipa kum 60 mi, Guwahati aṭanga rawn haw te, Armed Venga mipa kum 46, Mizoram police, Assam aṭanga rawn hawte an ni. An vaiin quarantine facility-a awm lai an ni a, symptom an nei lo.

RAT hmanga hmuh chhuahte chu Mizorama kai mi pali leh state páwn aṭanga rawn lut mi pahnih an ni a; state páwn aṭanga lutte chu - Lawngtlai district-a KMMTTP siamtu RDS company-a thawk mipa kum 37 leh 57 leh, P&E department hnuaia thawk Silchar lam mi kum 57 an ni. RDS-a thawkte'n symptom an nei lo a, P&E-a thawkin symptom a nei thung.

Covid-19 vei Mizorama kái chhâwngte dinhmun chiang zawk chu hmun dangah tarlan a ni.