Mamit YMA-in DC sàwmna hnar
Mamit DC Dr Lalrozama chuan nimin khan Mamita tlawmngai pawl hruaitute thil pawimawh sawihopuiah a sáwm a, YMA Sub-Headquarters, Mamit hruaitute chu an tel duh lo.
Vanglaini palai zawhna chhângin Mamit Sub-Hqrs. YMA hruaitute chuan, meeting-a an tel duh loh chhan an sawi a, "Karimganj DC nena an inbiakna chungchangah DC hian min kawm a tum niin kan hria a, mahse, an meeting minute-te kan han hmuhin tel chi-ah kan ngai lo," a ti.
YMA Sub-Headquarters, Mamit executive committee chu nimin vek khan an ṭhukhawm a, Mizoram leh Assam ramri buai chungchangah Mizoram sipaite duty-na hmun Zaite (Choto Bubirbond) leh Medili (Medlicherra) te Assam ramri chhung anga ngaih theih tura ziaka dah a ni chu an dem tak zet tih tarlangin, "Engti kawng mahin kan pawmzam thei ngai dawn lo," a ti.
Mamit DC leh Karimganj DC inbiakna thuah Mamit DC thu sawi kimchang tarlang si loa hleih nei taka Karimganj DC thusawi tam tak tarlan a ni bik an huat takzet thu tarlangin Mamit YMA chuan, "Tun hnu zelah Karimganj DC Anbamuthan MP hi biak chhunzawm zel chiah kan ngai lo," a ti a, meeting minute Mamit DC-in hming a ziah hnan chu pawi an tih thu an sawi.
Mamit YMA chuan an district chu state ramri leh International ramri depa awm a nih avangin ramri chungchangah leh thil dang dangah harsatna an tawh fo thu tarlangin, "Ramri himna tiderthawng thei nia lang meeting minute-a lang hming a ziah hnan thei hi mak kan tiin, hun lo kal zel turah pawh rin ngam harsa kan tih avangin tuna Mamit DC hi sawn chhuak a DC thar a rang thei ang bera min pe turin sorkar kan phut," an ti.