KHAWTHLIR

Inkhawmpui sawn
Mizoram Synod chuan nimin khan hriattirna a tichhuak a; April 23-25 chhunga neih tura ruahman pastor bial inkhawmpui chu May 21-23, 2021 chhunga neih turin sawn a nih thu a tarlang. Ruahmanna thar anga hman theih a nih loh chuan a hun ruahman chu Bial Standing Committee kutah dah a nih thu a tarlang bawk. Synod hian April 20-26 inkara department hrang hrang ṭhutkhawm koh tawh chu ṭhulh a nih thu a puang nghal a ni.

Thawhho rêl
Tun hnaia Khawzawl DC Zothanmawia hoa SP, 2nd IR Commandant, PWD EE, Champhai DLAO, Khawzawl Sub-Hqrs. YMA hruaitute leh kuhva rah phur lirtheiin a paltlang VC-te ṭhukhawm chuan, an district kaltlanga kuhva rah phurh ṭhin tihtawp a nih theih nan thawhho an rêl. Kuhva rah phur truck lianin kawng laih hna thawh mek a timuang a, a tihchhiat nasat bakah, Covid-19 a darh phah a hlauhawmah an ngai a ni.

Lunglei DC thupek
Lunglei DC chuan nimin khan thupek chhuahin, Mizoram sorkarin inkaihhruaina thar April 20, 2021-a a tihchhuah chu Lunglei district-ah hman vek tur a nih thu a puang.

Lirthei uluk tur
Mizoram sorkar chuan thuchhuah siamin, Lengpui Airport aṭanga khualzin phur tura thlan lirtheite chu uluk takin a khât tâwka phuh fai (sanitise) ṭhin tur a nih thu leh, driver leh passenger inkarah sarângin dáidanna mumal tak siam tur a nih thu a tarlang. Home quarantine tur, thuneitute'n an phalsakte erawh chu anmahni lirtheiin an inlam thei a ni.

ICU-ah mi 2 awm
State Referral Hospital-ah Covid-19 vei ICU-a enkawl mek mi pahnih an awm. SRH-ZMC Bulletin tarlan danin, SRH-ah hian nimin khan hripui vei mi pali dah luh an nih laiin, hri laka fihlim tawh mi pakhat chhuahtir a ni a, mi 28 an awm mek. ICU-a enkawl mi pahnih chu ventilator hmantir mek an ni a, Isolation ward-a awm mi 26 zingah harsatna lian tham nei an awm lo.