Sikul kái hun tur hriat theih a ni lo - School Education Minister

School Education minister Lalchhandama Ralte chuan, Covid-19 léng avangin academic session thar 2021-22 atana sikul kai ṭan hun tur hriat theih a nih loh thu a sawi. Hetih lai hian, HSLC leh HSSLC result chu ruahman lâwk angin tihchhuah tum a ni.

Vanglaini palai zawhna chhángin Lalchhandama Ralte chuan, State Disaster Management Authority hnuaia State Executive Committee (SEC) thu angin, May 4, 2021 aṭanga sikul kal ṭan hun tura ruahman tawh chu sût a nih thu leh notification tihchhuah a nih tawh thu a sawi a, "Sikul kài ṭan theih a nih dawn loh avangin online hmanga zirna kalpui turin zirtirtute hriattir an ni," a ti.

Minister chuan, sikul kai ṭan hun tur sawi lâwk theih a nih loh thu sawiin, "Ruahmanna kan lo siam tawh pawh Covid-19 avangin sût a ngai leh ṭhin a, a buaithlak khawp mai. Kan boruak thlír chung leh SEC-te ráwn chungin sikul kal hun tur la rêl ṭhat leh a ni ang," a ti a; ruahman lâwk angin sikul kai ṭan theih ni lo mah se, syllabus tihtlem leh tihtlem loh chungchang an la rêl loh thu a sawi.

School Education department-in ruahmanna a siam dan chuan, kum 2021-22 academic session atan May 4, 2021-ah sikul kai ṭan tur a ni a; mahse, hripui a hluar leh tâk avangin SEC chuan sikul kal a remti lo a ni.

HSLC leh HSSLC exam result chu a hun tur ruahman lâwkah tihchhuah tum a nih thu sawiin Lalchhandama Ralte chuan, "Chutih rualin, kan hma hun a hriat loh a, hripui vangin harsatna a awm chho dawn, exam paper endik kawngah harsatnate a awm dawn em hriat a ni lo. Ruahman lâwk hunah tihchhuah tum mah ila, tihchhuah theih a ni lo thei ve tho bawk," a ti.

School Education Minister chuan, Covid-19 léng avangin HSLC exam chhunzawm thei lo mi pahnih an awm thu sawiin, "Anni tan hian kan sawi lâwk tawh angin exam hun a hranpaa siam leh tum a ni. HSSLC lamah chuan Covid-19 avangin exam-ah harsatna nei kan la hre lo," a ti a; Chawngteah containment zone puan awm mah se, HSSLC exam turte chu ngaihnathiam an nih thu a sawi.

HSLC exam chu April 15 khan zawh a ni tawh a, June thla chawlh­kar hmasa berah result tihchhuah tum a ni. HSSLC exam chu April 30-ah zawh tur a ni a, June thla chawlhkar hnihna emaw, chawlhkar thumnaah emaw result tihchhuah tura ruahman a ni.