Khawpuiah páwna chhuah khap a ni District-ah thupekin zâwm a hlawh lo

Mizoram sorkar chuan nimin zing dar 4 aṭang khan Mizoram pumah in­khuahkhirhna khauh zawk a kalpui ṭan a, biak-ina inkhawm leh zirna-in hawn phal a ni lo. Aizawl leh district khawpuiah chuan phalna nei loa páwna chhuah khap a ni a; Aizawlah zawm a nih laiin, district khawpui tam zawkah zawm a ni lo.

Covid-19 léng laka invênna atana inkhuah­khirhna khauh zawk kalpuina tura inkaihhruaina, Standard Operating Proce­dure (SOP) chu Thawhṭanni zan zanlai pelh hnu deuhah Disaster Management & Reha­bilitation department-in a tichhhuak a; April 26, 2021 zing dar 4 thleng awh a ni dawn.

SOP tharah hian district khawpui tih loh khaw dang zawngah chuan a hmaa kal dan nen danglamna a tam lo a, danglam langsar ber chu inkhawm phal loh leh zirna-in zawng zawng khâr a ni.

Aizawl khawpui leh district headquarters bika kal dan tur hranpa siam a ni a; phalna nei loa páwna chhuah phal a ni lo a, lirthei tlân chhuah phal a ni lo. Inkaihhruaina thupek hi a ṭul dan azira ennawn leh tihdanglam theih a ni a; zâwm lote chu dan hmanga hrem theih an ni.

Inkhuahkhirhna hi Aizawl leh Mamitah chuan mipuiin an zâwm ṭha a, phal chin bâk dawr inhawng hmuh tur a awm lo. Lirthei che vêl a tlem a, mihring veivâk hmuh tur pawh an tlem.

Hetih lai hian, district khawpui dang - Lunglei, Siaha, Champhai, Serchhip, Lawngtlai, Mamit, Saitual, Hnahthial leh Khawzawlahte chuan thupek hian zawm a hlawh lo thung.

Vanglaini palaiin district khawpui hrang hranga mi a biakte chuan, inkhuahkhirhna thupekin zawm a hlawh loh thu an sawi hlawm a, "Nunphung pangngaiin kan awm a, dawr hawn vek a ni a, bazarah pawh dan pangngaiin an ṭhu. Sumdawnna lirtheite pawh ni dang ang thoin khawpui chhungah an tlân," an ti.

Khawpui ṭhenkhatah chuan inkhuah­khirhna thupek siam a nih thu hi chhûnah puan a ni a, mahse, mipuite nunphung pangngaia an awm hman tawh avangin awmzia a nei thui tawh lo.

Vanglaini palaiin a biakte chuan, inkhuahkhirhna thupekin zawm a hlawh loh chhan chu, inhriattirna mumal tak district thuneitute aṭanga a la chhuah loh vang a nih theih thu an sawi.

Thu dawn danin, DC ṭhenkhat chuan nimin khan meeting an ko a, district task force hotute vawiina kawm tum pawh an awm. Vawiinah chuan inkhuahkhirhna hian zawm a hlawh deuh tawh beisei a ni.

Inkaihhruaina thupek thar tihchhuah a ni
Mizoram sorkar chuan nimin zing dar 4 aṭanga April 26 zing dar 4 thleng awh tur inkhuahkhirhna a kalpui ṭanah Thawhṭanni zan zanlai pelh hnu khan inkaihhruaina tihchhuah a ni a, a hnuaiah hian tarlan a ni. Inkaihhruaina zawng zawng tarlan a ni lo.

A. MIZORAM PUMA HMAN TUR
1. State páwn aṭanga lut turte tan:
i) Mizoram luhna (point of entry)-ah RAT hmanga sample endik vek tur, RAT positive-te chu thupek ding lai anga enkawl zui tur a ni.
ii) Luhkáa RAT negative-te chu ni sarih chhung home/institutional/community quarantine tur a ni a, ni sarih hnuah RT-PCR/TrueNAT test a ni a, negative-te chu inkhung zui a ngai lo.
iii) Home quarantine-a awm chhungkuaa mi dangte chu páwna chhuak lo leh inléngte nena inchiahpiah loin ni sarih awm tur.
iv) India ram páwn aṭanga lut leh Covid-19, UK, Brazil, adt. variant/strain lènna ram aṭanga lutte chu HFW Department inkaihhruaina anga khung hran ngei tur. Mizoram an thlen hmaa India rama ni 10 aia tlem lo an awm tawh erawh chuan ram páwn aṭanga lut anga ngaih a ni lo.
v) Darkar 96 aia rei lo Mizorama chám tura zinte chuan entry point an thlen hma darkar 96 aia hlui lo RT-PCR/TrueNAT/CBNAT test negative result an neih chuan inkhung hran a ngai lo a, mi dang nen in contact lo thei ang bera awm tur.
vi) Zin veivâkte'n sample endik man an pek a ngai. Test man: RT-PCR - Rs. 1,200, TrueNAT - Rs. 1,000, RAT - Rs. 200.
vii) State páwn aṭanga thlawhnaa rawn lutte chu Transport department-in an thlan lirthei hman tur a ni a, din khawmuan loh tur.
viii) Screening leh quarantine dan tur fel taka ruahman a nih theih nan Mizoram rawn luh hmain mCOVID-19 mobile application mPASSflight emaw mPASS-road hmangin inhriattir lâwk tur. Home quarantine leh hotel quarantine dil duh tan https://mcovid19.mizoram.gov.i... ah dilna thlen tur a ni.

2. Containment zone puan:
i) A ṭul chuan DC-te'n an huam chhungah containment zone an puang thei.
ii) LTF/VTF-te'n veng/khaw bila inkharkhip leh khualzin luh phal loh puan phal a ni lo.

3. Bungraw phurh kual dan tur:
i) State pawn aṭanga bungrua la lut turin phalna hranpa lâk a ngai lo a, mCOVID-19 ah inziah luh a ngai thung.
ii) Bungraw phurtu (driver leh handyman)-te entry point-ah screening tih tur.
iii) State páwn lam mi bungraw phur luttute'n backload la turin Mizoram hmun dangah an kal kual tur a ni lo.
4. Zirna-in, biak-in leh puipunna:
i) Public park, picnic spot, movie theatre, gym, community hall, restaurant, shopping complex, mall leh intàwllênna hmun zawng zawng chu khâr tur.
ii) Zirna-in leh sakhaw biakna hmunte khâr vek tur a ni.
iii) Board exam, all India exam leh recruitment exam kal laite chu chhunzawm phal a ni.
iv) Inneihna leh reception-ah mi 30 aia tam tel phal a ni lo.
v) Mitthi vuinaah mi 30 aia tam tel phal a ni lo.
vi) Chhiatni/ṭhatni puipunnaah ei leh in sem/siam phal a ni lo.

5. Zin veivah chungchang:
i) Mizoram chhungah chhuah ṭanna khua/venga LTF/VTF lehkha kengin zin veivah phal a ni.
ii) VTF/LTF lehkhaah chuan kal ṭanna leh kalna tur chiang taka ziah lan tur.

B. AIZAWL & DISTRICT KHAWPUI TANA HMAN TUR
1. Mipui vantlang inkhuahkhirhna:
i) Inkhuahkhirh hun chhungin mahni in/compound chhuahsan phal a ni lo.
ii) Lirthei veivah khap tlat a ni a, chhuah phalna neite lirthei erawh a huam lo.
iii) Páwna chhuak turte'n hmai tuam vek tur a ni.
iv) Vantlang hmunah ft. 6 tala inhlata awm tur.
v) Phalna neia dawr hawngte'n tlai dar 5 hmain khâr vek tur a ni.
vi) Inkhuahkhirhna kalpui chungchangah LTF/VTF-te chu hma la chhunzawm tura beisei leh ngen an ni.
vii) Zan curfew puan tawh chu khauh lehzuala kenkawh zel tur a ni.

2. Inkhuahkhirhnain a huam lohte:
i) Hospital, nursing home, clinic, laboratory, Covid-19 vaccination leh immunization programme dangte, OST centre, ART centre, ambulance service, blood bank leh damdawi dâwr.
ii) Veterinary hospital, dispensary, clinic, zoo, hatchery leh vaccination.
iii) Agriculture, horticulture, sericulture, animal husbandry leh fisheries hna leh a kaihhnawih thlai chi, leiṭha, ran chaw leh hmanraw dawr.
iv) Bank, insurance, ATM leh postal service, blood donation camp/service.
v) Kohhran office kal leh kohhran hotute programme pawimawh.
vi) Power & electricity, water supply (mimal tui chawite huamin), sanitation & solid waste management (hmunphiat leh bawlhhlawh paihte huamin), telecommunication, internet service, broadcasting leh cable service.
vii) Filling station, LPG.
viii) Fair price shop/ration dawr.
ix) Nau pai, nausen pawm leh naupangte hnena nutrition sem.
x) Bawnghnute lakkhawm leh sem.
xi) MGNREGS, MPLADS leh MLALADS hnuaia hnathawh.
xii) Print leh electronic media, leh chanchinbu sem.
xiii) Bungraw load leh unload hna.
xiv) Private security service.
xv) Courier service, e-Commerce leh home delivery service.
xvi) Covid-19 duty-te hman taxi leh rental motor.
xvii) Medical emergency leh chhiat tawh thila chhuah ngai, VTF/LTF hriatpuina lehkha nei.

3. Bazar leh chawhmeh zawrh:
Bazarpuia thlai leh thil dang zawrh khap a ni. Mipui mimirin awlsam taka thlai leh chawhmeh an hmuh theih dan tur LTF/VTF-te'n an ruahman ang.

4. Phalna neia kalpui theihte:
i) Ni tin mamawh leh eichawp, thlai leh thei, pangpar, sa leh sangha zawrhna.
ii) Bungraw phur motor mamawh, oil leh spare part zawrhna dawr leh loh theih loh thila hawn ngai motor siamna bik workshop/ puncture work hawn.
iii) Cold storage leh warehousing service.
iv) Data leh call centre.
v) Hmasawnna hna hrang hrang thawhna atana bungraw mamawh - steel, cement, brick, balu, in sakna bungrua zawrhna dawr.
vi) Mi panga aia tam lo thawhna - carpentry workshop, steel fabrication workshop, bakery, tailoring, weaving, adt.
vii) A chunga mite hi VTF/LTF remruatnaa kalpui tur a ni.

5. Sorkar office kal dan tur:
i) Sorkar hnathawk leh sorkar sum aṭanga hlawh late chu Covid-19 duty turin a ṭulna apiangah hman theih an ni.
ii) HFW, Police, Home Guards, Civil Defense, Fire & Emergency Services, DMR, district administration, Civil Aviation, Prisons, Excise & Narcotics, municipal service, Forest field work, PHE, IPR, P&E-te dan pangngaiin (full strength) an kal ang.
iii) Sorkar department/pisa dangte chuan hotu (head of dept./office)-te'n ṭul bika kal tur an ruahman ang.

6. Hmasawnna hna thawh:
i) Lungrem, tui luankawr, kawng laih/siam, in sak, lei dawhte chhunzawm phal a ni.
ii) Lo, ran vulhna leh sangha khawina hmunah phalna hranpa lâk ngai loin hna thawh theih a ni a, hmun khatah mi panga aia tam awm phal a ni lo.
iii) Electrician, plumber, mechanic, thing mistiri leh cement mistiri leh helper-te an thawhna LTF/VTF hriatpuinain hna thawh phal a ni.
iv) Quarry-a lung lâk, block/brick siam, rawra her leh chhut, thingzai khawla thing zai theih a ni.