Sailulâkah chinghniain sial a seh ṭhin

Tunlai hian Sailulâk khuaa sial vulhte chinghniain a seh ṭhin avangin sial vulhtute an mangang hle a; sial him nan niléng zankhuain ramhnuaiah an invèn chhâwk ṭhin.

Sailulâk Sial Vulh Association (SSVA) chuan thuchhuah siamin, tun hnaiah chinghniain sial pathum a seh thu sawiin, "An awmna chin hriat loh sial eng emaw zat a awm mek. Kan khuaah hian sial 350 vel awmin, chhungkaw 45 zetin eizawn nan an hmang chho mek a. Chinghniain a seh tâk zelah chuan chhungkaw tam tak chu mangangin an buai hle. Mutmu pawh an tuah ṭha meuh lo a ni," an ti.

Sial vulhna hmun bik siam a ni chungin chinghniain an seh tho ṭhin thu tarlangin SSVA chuan, "Sial himna tur ngaihtuahin, dah khawmna tur hmun zím zawkte kan siam a, chinghne laka venhim tumin nasa takin hmalak a ni," an ti a; chhûn zan zawma an invèn chhâwk avangin sial neitute chu an hah zual thu an sawi.

SSVA chuan, kum 2020 khan chinghniain an sial 40 vel a seh hlum thu sawiin, "Sorkar aṭangin ṭanpuina hmuh a awm lo. Chuvangin, theih ang angin venhim hna ngawrh leh zuala kalpui a ni. Forest department lam pawh a hmunahte an kal a, sial neitute pawh an lawm hle. Sial thi claim dan tur chungchang pawh department hian an buaipui tur thu sawi mah se, nikum ang mai kha a nih leh kan hlau hle a ni," an ti.