Mamit leh Karimganj DC meeting thu rel MZP leh MSU-te'n an hâl; DC sawn phût

2nd November, 2020

Zirlai pawl pahnih - MZP leh MSU-te chuan Inrinnia Mamit DC Dr Lalrozama leh Karimganj DC Anbamuthan MP-te inbiaknaa meeting minutes, hming an ziah hnan ve ve chu ram leh hnam tan a him loa ngaiin an hâl.

DC-te inbiaknaah hian Karimganj DC chuan, Chuto-Bhubirbond leh Medlicherra area chu Assam ram, Karimganj district chhunga mi a nih thu leh Survey of India map-ah pawh chiang taka tarlan a nih thu a sawi a, chu'ng hmuna Mizoram sorkarin police a dahte chu hnûkkîr turin a ngen. Hei hi meeting minutes-ah tarlan a ni a; Karimganj DC thusawi Mamit DC-in a hnialna ziah lan a ni lo.

MZP chuan, meeting minute chu Vanapa Hall kawtah an hâl a; MZP president B Vanlaltána chuan, "Ramria buaina kan tawh mek lai leh kan ram kan chàn lohna tura Mizo mipui lungrual taka kan thawhho mek laiin, Mamit DC-in mipui duh dan zah lo leh kan hnam tana pawi thei tura Karimganj DC inbiakna a neihpui hi a thinurthlak kan ti hle," a ti.

MZP President chuan, Karimganj DC chu Mizote thlám hâltu leh thlai tam tak suat tura thu petu a nih thu sawiin, "Mizo mipui tan harsatna min siamsak chhunzawm a, inbiakna neihpui tawh lo turin kan ngen tawh pawh zah loa inbiakna a awm leh hi kan pawm thei lo," a ti a; Mamit DC chu a rang thei ang bera sawn turin sorkar an phût tih a sawi.

MSU pawhin meeting minute chu CM Office gate bulah an hâl a; MSU vice president J Lalmuanzuala chuan, "Mamit DC leh SP-te hian Zoram mipui duh dan ni lo leh remti lo chunga Karimganj DC meeting an neihpui hi kan dem. Meeting agenda pakhatnaa Mizoram police-te in withdraw dan tur sawiho tura chhawp a ni ringawt pawh hi kan duh lo," a ti.

MSU Vice President chuan, meeting minute-a a lan danah, Karimganj DC-in vawi eng emaw zat Mizoram police-te an in withdraw tur a ni tih a sawi chungin Mamit DC-in a chhàn lêtna a awm ve lo tih sawiin, "Mamit DC hi kan ram chin hum turin a ṭawng chhuak ngam loah kan ngai," a ti a; DC Dr Lalrozama leh Mamit SP Shashank Jaiswal chu darkar 24 chhunga sawn chhuak tura an phût thu a sawi.