MLA-in Vairengte screening point tlawh

Serlui bialtu MLA Lal­rin­sanga Ralte chuan nimin khan a bial chhunga Vairengte screening point a tlawh a, duty-te mamawh leh inbuatsaih dan a enpui bakah, sorkar official-te leh khawtlang hruaitute nen an inkâwm.

Lalrinsanga Ralte chuan, Phaisenah screening point thar nimin aṭangin kalpui a nih thu sawiin, "Saiphai screening point pawh ni hnih khat hnua kalpui theih mai tura buatsaih a ni," a ti a; laboratory technician leh helper-te pawh dah turin Health department a inbuatsaih mek tih a sawi.

Vairengte, Phaisen leh Saiphai chu Mizoram kawtchhuah an nih thu sawiin MLA chuan, "Mizoram zin vei vak mi 80% velin luh leh chhuahna atana an hmang a, kan eibàr lak luhna kawng pawimawh ber atan hman a ni bawk," a ti.

Lalrinsanga Ralte ho hian Vairengte Forest IB-ah SDO (Civil), Medical Officer, SDPO, Police Station OC, Vairengte Joint VC, Joint VTF leh Joint YMA hruaitute an ṭhukhawm a; Vairengte screening point chu RAT negative certificate lem hmanga kaltlang leh certificate nei loa kaltlang an awm ṭhin nia social media lam a thu thehdarh awm ṭhin chungchang leh Covid-19 SOP khauh taka kalpui dan turte an sawiho a ni.