Speaker meeting-ah Rinliana Sailo a tel

Lok Sabha speaker Om Birla chuan April 19, Thawhṭanni khan India rama state leh union territory tina Legislative Assembly leh Legislative Council speaker leh chairman-te video conference kaltlangin a kâwm a; Mizoram aṭangin Assembly speaker Lalrinliana Sailo a tel.

He hunah hian state leh UT tin aiawhin mi pakhat zelin thu an sawi a; Lalrinliana Sailo chuan Mizorama Covid-19 dinhmun leh sorkar hmalaknate a tarlang.

Lalrinliana Sailo chuan, Mizoram MLA-te'n Covid-19 dona atan an hlawh aṭangin sum eng emaw zat an thawh tawh thu sawiin, "MLA-te leh sorkar hmalakna piah lamah, tlawmngai pawl, kohhran leh mipuiin an thawh hlâwk hle," a ti.

India ram pum huapa inkhàrkhip (lockdown) puan a nih hmain Mizoramah lockdown puan a nih tawh thu sawiin Speaker chuan, "Nikum March thla laihâwl aṭang tawh khan Rapid Antigen Test (RAT) hmangin ramri luhka zawng zawngah test kalpui a ni a, vanduaithlak takin Covid-19 hri léng thawh hnihnain India ram pum a tuam mek laiin, Mizoramah pawh case a pung chak hle a ni," a ti a; Covid-19 thawh hnihna donaah Mizoram sorkar chu nasa taka a inbuatsaih mek thu a sawi.

Speaker hi deputy speaker Lalrinawma, Parliamentary Affairs minister TJ Lalnuntluanga leh opposition group leader Vanlalhlana ten an ṭawiawm a ni.