Covid-19: Mizoram dinhmun

April 19, Thawhṭanni khan Mizoramah Covid-19 vei mi 91 hmuh chhuah a ni a, thla nga leh a chanve chuang hnua hmuh chhuah tam ber ní a ni. Vawiin khan hripui laka fihlim tawh mi 23 chhuahtir an ni thung.

ICU-ah mi 2 awm
State Referral Hospital-ah Covid-19 vei ICU-a enkawl mek mi pahnih an awm. SRH-ZMC Bulletin tarlan danin, SRH-ah hian vawiin khan hripui vei mi pali dah luh an nih laiin, hri laka fihlim tawh mi pakhat chhuahtir a ni a, mi 28 an awm mek. ICU-a enkawl mi pahnih chu ventilator hmantir mek an ni a, Isolation ward-a awm mi 26 zingah harsatna lian tham nei an awm lo.