Chief Secretary kaihhruai committee-in Mizoram ramri chinfel dan tur sawiho

Mizoram leh Assam ramri ngaihtuahtu Core Committee chu tun hnai khan chief secretary Lal­nun­mawia Chuaungo hoin a pisaah an ṭhukhawm a, Mizoram leh Assam ramri chinfel dan tur an sawiho.

Meeting-ah hian Assam leh Mizoram ramri chinfel a nih theihna tura hmalakna awm tawh te, hmalak mekna hrang hrang te, map hman lai dik lo chungchang leh siamṭhat dan tur point hrang hrang te, Britsih-in India ram a awp laia Assam leh Mizoram ramri document awm thei ang angte leh British hun laia notification awm thei ang ang leh, Mizoramin a neih ang angte an thlirho a ni.

Document awm angte meeting chuan duhthusam loah a ngai a, March thla chhunga document leh sorkar notification awm ang angte lak khawm a, sawiho leh an rel. Ṭhutkhawm leh hunah an thil hmuh chhuahte Chief Minister hnenah an thehlut ang.

Ruahman dan chuan, Chief Minister-in report a endik hnuah Mizoram sorkarin sorkar laipuiah inbiakna tur rawtna a thlen ang a, sorkar laipui kaihhruaina hnuaiah Mizoram leh Assam sorkar inbiak dan tur kawng zawn tum a ni.

Meeting-ah hian conservator of forest Lalthlamuana Pachuau, archivist F Lalthanmawia, Kolasib DFO Lalnunzira, Home deputy secretary David H Lalthangliana, Land Revenue & Settelement department aiawh leh MZP office bearer-te an tel a ni.

MZP president L Ramdinliana Renthlei chuan Mizoram leh Assam ramri chinfel chungchang hi harsa anga lang si, harsa lutuk lo nia an hriat thu sawiin, "Mizoram sorkar hian vei deuh se chuan awlsam te a sawifel theih mai a ni. Tun dinhmunah chuan kan sorkar hian a vei lo em mai a, a harsa angin a lang mai ṭhin a ni," a ti.

Kan ramri-ah hian hnamdangten min chimral zel tih sawiin MZP President chuan, "Ramri vei sorkar Mizoram hian kan mamawh ta khawp mai kan sorkar thar pawh hian tun ai hian vei se MZP chuan kan duh hle a ni," a ti a, ramri chungchang bik ngaihtuah tu tur Boundary Development department siam tura sorkar an ngenna chu tihhlawhtlin a la nih loh thu a sawi.