Ni 2 chhunga hripui vei hmuh mi 62 zingah tualchhunga kái 45 an awm

Ni hnih - October 30 leh 31 chhunga Mizorama Covid-19 vei hmuh chhuah mi 62 zingah Mizoram chhunga kái mi 45 an awm a; mi 44 chu Aizawla veng 20-a mite an ni a, mi pakhat chu Mamit Lungsira mi a ni thung.

Sorkar thuchhuah aṭanga a lan danin, ni hnih chhunga Mizoram tualchhunga hripui kái hmuh chhuah zinga mi 10 chu an kàina hriat theih loh a ni a, mi 32 chu an kaina hriat theiha ngaih niin, chanchin kimchang tarlan loh pathum an awm bawk. Mi 45 zinga mi 17-in taksaah harsatna an nei (Covid-19 symptom a lang) a ni.

Covid-19 positive October 30-a hmuh chhuah mi 28 zingah tualchhunga kái mi 16 awmin, chu'ng zinga mi pali chu kaina hriat loh a ni a, mi pangain symptom an nei a, mi pathum dinhmun hriat chian a ni lo.

October 31-a hripui vei hmuh chhuah mi 34 zingah tualchhunga kái mi 29 an awm a, chu'ng zinga mi paruk chu an kài ṭanna hriat loh niin, symptom nei mi 12 an awm. Endeavour School-a hripui vei tawhte kaihhnawiha hmuh chhuah belh mi panga an tel a, hripui vei hmuh tawhna tho - Ebenezer School leh Staines Memorial School zirlai pakhat ve ve an awm a; Civil Hospital, Aizawla thawk mi pahnih an tel bawk.