Lalnghinglova Hmar-in nomination a file

April 11, 2019-a Lok Sabha inthlanpui neih tura Indian National Congress (INC) leh Zoram Peoples' Movement (ZPM)-in mipui candidate atana an vawrh chhuah Lal­nghinglova Hmar chuan March 23, Inrinni khan returning officer Van­lalngaihsaka, Aizawl DC/DEO hnenah nomi­nation paper a thehlut. Lalnghinglova chuan press mite zawhna chhangin, MP a niha a ngaih pawimawh turte a sawi.

Lalnghinglova Hmar chuan tun hma aṭangin Mizoram tan a phâk tawkah a theihna sang ber a hlân tawh ṭhin tih sawiin, "Tunah ram tana rawngbawlna zau zawk leh sang zawk, MP nihna hmanga Mizoram tan ka theihna sang ber hlan tuma pen chhuak ka ni a, ka theihna zaa za pek ka tum," a ti.

Mipuiiin an vote chhan tur zawhna chhangin Tetea Hmar chuan, tun ṭum inthlanah party hrang hrangte chu hlawm lian tak pahnih BJP lamṭang (NDA) leh BJP lo lamṭang (UPA)-ah ṭhen an ni tih a sawi a, "NDA/BJP lo lama ṭang ka nih avangin mipuiin min vote ka ring. NDA chu BJP kaihhruai 1998-a din a ni a, Shiv Sena leh MNF-te pawh an tel," a ti a; Lok Sabha inthlan chu sorkar laipuia roreltu tur thlanna a nih avangin mipuiin BJP thawhpui an vote chuan, Kristiante tana harsatna siam ṭhintu BJP leh Narendra Modi an vote tihna a nih thu a sawi.

Tetea Hmar chuan, Citizenship Amendment Bill (CAB) bakah, a aia hlauhawm Uniform Civil Code te, Ram temple avangte hian NDA lo lam aṭang hi mipuiin an vote duh a rin thu a sawi a, "Ka candidate puite aiin ka ṭha bik lo, ka thiam bik hauh lo ang, mahse, kan ṭhatlai ber, kan thluak a fîm lai, taksa a chak lai, theihna a san lai bera pên chhuak ka nih avangin mipuite'n min vote ka beisei a ni," a ti.

MP-ah tling ta se, hma a lak dan tur zawhna chhangin Lalnghinglova chuan, "A hmasa berah CAB chungchangah ka theihna zâwnah ka duh lohzia lantirin tun aia nasain ka au dawn. Chutih rualin, CAB hi thil pakhat chauh a ni a, tih theih dang tam tak a awm," a ti a; Look East Policy chu Mizoram ei leh bara into­delhna leh sumdawnnaa hma­sawnna tura pawimawh a nih a­vangin lian zawka a hlawh­tlin theih nan na zawka nawr a tum thu a sawi.

Lalnghinglova Hmar chuan, MP fund mai ni lo, thil dang MP nihna anga tih theih tam tak a awm a, chu'ngte chu Mizoram tan hai chhuah a tum thu leh, Mizoram leh Central leh corporate-te inthlunzawmna ṭha a ngai pawimawh thu a sawi a; chutih rualin, "Hmasawnna zawng zawng pan ruak ruak ṭha ka ti chuang lo a, Mizo ram leh hnam hi a him em, tih hi ka ngaih pawimawh hmasak a ni. MP ni chungin Zofate inpumkhatna kawngah nasa zawka hmalak theih ka in beisei," a ti.