Thla 3 MNF sorkar leh kum 10 Congress sorkar hnathawh a inhen - C Lalrosanga
Lok Sabha inthlan tura MNF candidate C Lalrosanga chuan, thla hnih/thum lek MNF an sorkar chhunga hna an thawhte chu Congress sorkarin kum 10 chhunga an thawh nen a inhen deuh thaw tawh niin a sawi.
C Lalrosanga hian March 22 khan Sesawng, Khawruhlian, Ratu, Sakawrdai leh Darlawnahte vantlang inkhawma thu a sawi a, Inrinni khan Suangpuilawn, Phullen leh Saitualahte hun a hmang lehin, thu a sawi ṭhin a ni.
C Lalrosanga chuan, kum eng emaw zat kal ta aṭangin 'Wake-up Mizoram Ministry' an din a, politics a ṭhat theih nan an tlangau a, an ṭawngṭai ṭhin tih sawiin, an ṭawngṭai chhannaah Zoramthanga sorkar a piang ta niin a sawi a, "Thla hnih/thum lek a sorkar chhungin hna ṭha tak tak, Congress sorkar kum 10 thawh hen deuh thaw an thawk hman a ni," a ti.
MLA inthlan dawnah party hrang hrangin candidate turin amah chu an sáwm nia sawiin Lalrosanga chuan, "MP-ah pawh Congress hian candidate-ah min sáwm. Chu'ngte chu Pathian min kohna ni theiin ka hre lo a, mahse, Lal Isua'n ram tina chanchin ṭha hril tura min tih angin, Pathian leh kan ram tan titu MNF-ah MP ka nih chuan, tih theih a awm tih ka hria a, lungsi takin ka pawm ta a ni," a ti a; MNF ministry ruahman anga kalpui tur MP neih a ṭul niin a sawi.
C Lalrosanga chuan, Parliament kalphung leh hnathawhna lamah a mikhual lo nia sawiin, sorkar hna a thawh chhungin MP hrang hrangte a dâwr tawh ṭhin tih a sawi a; ramri, hnam leh sakhua humhalh a ngai tih a hriat thu sawiin, "CAB chungchang hi CM-in PM leh Home Minister a hmu tawh a, Council of Ministers meeting pawhin vawi hnih an duh loh thu an pass tawh. MNF chuan Parliament-ah a pawmpui ve ngai lo ang," a ti.
MNF Candidate chuan, Mizoram tana ṭha lo turah chuan MNF-in NDA/NEDA a thláwp ngai dawn lo nia sawiin, "Ram tana thil ṭhaah chuan NDA/BJP thlâwp pawh a pawi lo," a ti a; a khingpuite zawkin a rûkin NDA an zawm reng zawk niin a sawi.