KHAWTHLIR

Thisen pe
Inrinni khan Khatla Branch KṬP chuan an golden jubilee pualin Synod Hospital tan thisen unit 48 an pe a, a petute mipa 39 leh hmeichhia pakua an ni a, Chhandamna Kohhran ṭhalai, Chaltlangte'n Synod Hospital-ah unit 6 an pe bawk. Aizawl Civil Hospital tan ṬKP Aizawl West Unit, Dinthar chuan thisen unit 21 pein, a petute mipa 17 leh hmeichhia pali an ni a; Chhiahtlang Student's Union-in unit 34, Chatlang Bial PYD (NEI)-in unit 23, South Lungpher Student Welfare-in unit 15 an pe bawk. Saikao MTP Branch-in Siaha Blood Bank tan unit 20 an pe bawk a ni.

Aurinna phal lo
Aizawl District Magistrate chuan thupek chhuahin, Aizawl district chhungah District Magistrate phalna tel loin aurinna hman phal a ni lo tih a puang. Thupek hi April 11, 2019-a Lok Sabha inthlanpui leh Assembly bye-election him leh thlamuang zawka neihna tura ruahman a ni a, magistrate, police leh armed force-te erawh a huam lo. Thupek hi March 20 aṭanga thla hnih chhung hman tur a ni.

Vawk lak luh khap
Aizawl DC leh Lawngtlai DC chuan a hranpa ve vea thupek chhuahin, district hrang hrangah vawk natna hri Porcine Reproductive and Respiratory Syndrome (PRRS) a la lêng meka hriat a nih avangin, an district-ah hmun dang aṭanga vawk lak luh te, an district aṭanga hmun danga vawk lak chhuah te, vawk thi khâm leh luikawra paihte leh vawk hrisel lo talhte khap a nih thu a puang. Thupek hian thla hnih chhung a a awh dawn a, thupek zâwm lote chu IPC Section 188 hmanga hrem theih an ni.

Eye camp
National Programme for Control of Bllndness & Visual Impairment (NPCBVI), Lawngtlai district bul tumin Chawngte community health centre-ah March 19-22 chhung khan a thlawna mit entirna (free eye camp) buatsaih a ni a, mi engemawzat mit endik sak a ni a, zai ngaite chu zai sak nghal an ni.