BJP MP candidate Nirupam Chakma West-I ah BJP-in MNF an thláwp dawn
April 11, 2019-a Lok Sabha inthlanpuiah BJP chuan candidate atan Nirupam Chakma an ruat a; Aizawl West-I Assembly bye-election-ah erawh chuan candidate siam loin, MNF candidate an thláwp dawn.
BJP hian March 21, 2019 khan New Delhi-a an hmunpui aṭangin India ram hmun hrang hranga an candidate tur ṭhenkhatte list an tichhuak a; chutah chuan Mizorama an candidate tur pawh telin, Mizorama an candidate tur chu BJP Mizoram Pradesh-a vice president Nirupam Chakma a nih thu an tarlang.
Thu dawn danin, BJP, Mizoram Pradesh hian Lok Sabha inthlana an candidate tur hi an duh zawng thlangin, chu chu national-a an hmunpuiah pawh an thlen a; mahse, Mizorama mite'n an duh an thehluh chu Delhi-a hotu lian zawkte'n pawm loin, Nirupam Chakma an dah ta zawk a ni.
Hetih lai hian, Mizoram BJP hian Aizawl West-I Assembly constituency bye-election neih turah erawh chuan a hranpaa candidate siam an tum lo a, MNF candidate Zothantluanga an thláwp tur thu an puang.
Aizawl West-I Assembly bye-election-a candidate siam ve loh chungchangah hian Mizoram BJP president Prof. JV Hluna chuan, an hmunpui Delhi lama an hotute'n candidate hranpa siam loa MNF candidate thláwp mai tura an rawn thu leh, an hotute thu chu ṭha an ti a, an thlâwp thu a sawi.
Prof. JV Hluna chuan, MNF candidate an thlàwp tur thu chu official-in puang lo mah se, MNF chu NEDA-a BJP thawhpui an nih tho avangin MNF candidate chu an thláwp dawn tih a sawi bawk.