Hnahthial mipuiin lawmthu sawina hun hmang

Mizoram sorkarin Hnahthial district tihpuitlinna turin Mizoram budget tharah cheng naui 150 a dah avangin Hnahthial Group YMA chuan March 23, Inrinni khan Pathian leh sorkar chunga lawmthu sawina hun an buatsaih a, mi ṭhahnem tak telin, kawng an zawh.

District headquarters lawmna kawngzawh hi Hnahthial chhim lamah Nauhruaikâwn aṭanga ṭan a ni a, hmar lamah Electric Veng Hall kawt aṭangin ṭan a ni thung a, Bazar kâwnah intâwkkhawmin, inkhawm buatsaih a ni. Kawngzawhnaah hian lawmna thuziakte an ken bakah, an au rual a ni.

Bazar kawna inkhawmah Hnahthial Group YMA president B Lalhmingliana chuan, kum 20 kal taah district an hmuhna turin nasa taka hmalak a ni tih sawiin, "Tun sorkar tharin district pathum function nana sum a dah ta hi a lawmawmin kan hruaitu ṭhahnem ngai tak tak, vawiin hun hmu hman loa mual min liam san tate kha kan hre reng a ni," a ti a; Hnahthiala damdawi-in 'Sub-District Hospital' tih ṭhin chu 'District Hospital' tih a ni tawh dawn tih a sawi.

Inkhawmah hian Hnahthial Kohhran Joint Committe (HKJC) chairman Rev. Dr Rodinmawia Ralte-in hunserh a hmang a; Hnahthial Grup YMA secretary C Lalramdinsanga'n Hnahthial district a puitlin theihna tura hma­lakna hrang hrang a sawi. Hnah­thial District Function Demand Committee (HDFDC)-a term thum chairman ni tawh Rev. Lalthla­muana'n thu a sawi bawk.

Hnahthial district tihpuitlin a nih dawn vanga Chief Minister hnena lawmthu sawi nan CM Relief Fund-a chhûn luh turin báwm an dawh a, Rs. 10,880 a tling khawm a ni.