ZNP-in July 8, 2016-ah NDA an chhuahsan
ZPM chuan thuchhuah siamin, ZPM-a tel zinga NDA zawm ṭhin ZNP chuan July 8, 2016-ah NDA an chhuahsan tawh tih an tarlang a; MNF party chu NDA chhuahsan an tum lohzia thup nan leh sawi mawi nan ZNP leh MPC-te chu NDA-a la tel ve reng anga sawia mipui bum tumah an puh.
ZPM chuan, MNF president Zoramthanga chuan April 11-a inthlan awm tur atana a campaign-naah, ZNP leh MPC party-te chu BJP kaihhruai NDA leh NEDA-a tel ve reng leh a hnuah pawh tel ve zel dil thar angin a sawi tih sawiin, "Mizo mipuite dâwt ngial ngan tak hmang bum a la tum zel hi vanduai thlak kan ti," an ti.
ZPM tarlan danin, Congress kaihhruai UPA-in Central leh Mizoramah sorkarna an chelh lai, kum 2014-a MP inthlan dawnah opposition party zawng zawng - ZNP, MPC, MDF leh MNF-te chu ṭanghoin, candidate inṭâwmah Robert Romawia Royte an hmang a, chumi hnuah ZPM-a tel mek ZNP-te pawh NDA-ah an tel zui a, MPC erawh an tel zui lo.
BJP kaihhruai NDA sorkar hnuaia Uniform Civil Code te, bawng talh khap te, Yoga leh thil dang, Kristianna nena inkalh leh Kristiante nêkchêp tumna ang zawnga thil a kal tak avangin ZNP chuan NDA chu tel zelna tlakah a ngai lo tih sawiin ZPM chuan, "BJP leh NDA chu a doa do ngai chi-ah ngaiin, July 8, 2016 (Zirtawpni)-ah NDA aṭangin an inhnûkdâwk a, he thu hi a tûk July 9, 2016 (Inrinni) Vanglaini chanchinbuah pawh tarlan a ni," an ti.
ZPM chuan, NDA leh NEDA-a telte list chu eng lai pawhin Google-ah hmuh mai theihin a awm tih sawiin, "Mipui hi awlsam taka bum theih kan ni tawh lo tih hi MNF President leh CM Pu Zoramthanga hian lo hre tawh se," an ti a; MNF party chu NDA-a tel mek list-ah serial no. 16-ah chiang taka tarlan a nih thu an sawi.
BJP chu an sorkar leh chuan Citizenship Amendment Bill tharthawha kaltlangpui ngei tumtu leh 'One Country, One Reliigion' aupuia Uniform Civil Code kalpui ngei tumtu an ni tih sawiin ZPM chuan, "BJP kal tum dan hi Kristiante tan chuan engti kawng pawh tel ve a rem lo. MNF-te CAB dodal anga insawi reng chunga CAB tihpuitlin tumtu BJP/NDA-a tel reng si hi mipui lakah dâwta inphenna leh hmai phihfai tumna chauh a ni," an ti.