Hindi Training College zirlaite'n Principal duh loin badge dum bel

Mizoram Hindi Training College (MHTC)-a zirlai (trainee)-te chuan, MHTC principal Louis Hauhnar laka an lungawi lohna kal zelah, March 22, 2019 aṭang khan Principal sawn chhuah phût class-ah badge dum an bel ṭan a, Principal chu sawn chhuah a nih hma loh chuan badge dum belin class kan kal dawn tih an puang.

MHTC zirlaite chuan, an college Principal thuneihna hnuaiah exam an duh tawh lo tih an sawi a; exam hall chhungah, 'Hindi teacher in ni thei chuang lo ang, in career ka tichhe vek dawn, internal mark pawh 0 in hmu vek ang, in duh duh chu ti rawh u, kei pawhin eng nge ka tih theih in hria ang,' tiin a vau nia sawiin, "Min vau dan zawng zawngah te, zirlaite min diriamna zawng zawng avangte hian trainee-te hi tuna Principal hnuaiah chuan kal ngam ngaihna a awm lo a ni," an ti.

Zirlaite chuan, MHTC principal Louis Hauhnar chu sawn chhuak thuai turin sorkar an ngen nawn a, "Ngaihngam taka class kan kal ve theihna turin Mizoram sorkarin Principal hi min sawn chhuahsak hma loh chu kan do zel dawn a ni," an ti a; Principal chu dik lo taka zirlaite zahawmna rapbet duhtu, ṭawngkam chhe tinreng zirlaite ṭawng khum duhtu, trainee-te engahmaha ngai lotu niin an sawi a ni.