Assam police-te'n Mizorama lut tur truck an vènte an bîkbosan Vairengte dáiah lirthei dang mek

Zoram Drivers Union (ZDU) chuan Aizawl lam aṭanga Assam lam pan tur lirtheite Vairengte khaw dáiah an dang mek. Hetih lai hian, Lailapur-ah pawh Mizoram pan tur bungraw phur lirtheite dan a la ni zel a; October 31, Inrinni zing khawvar hmaa Assam police venna hnuaiah lirtheite'n Mizoram rawn pan mah se, Lailapur-ah police-in an bîkbosan avangin Silchar-ah an tlân lêt.

ZDU hruaitute chuan Vanglaini palai zawhna chháng­in, Union Home Secretary leh state pahnih Chief Secretary-te inbiakna bawhzuiin lirthei an dante an chhuah nghal vat thu an sawi a, "Mahse, Assam lamin lirthei an dante an chhuah ve duh loh avangin October 30 zan dar 10:30 vel aṭang khan lirtheite kan dang ve leh a ni. Lailapur aṭanga lirtheite chhuah a nih hma chuan chhuah kan tum tawh lo," an ti.

YMA, Silchar Branch, Silchar MSU, Mizoram Oil Tanker Driver Association aiawh leh Mizoram Indane Driver Welfare President-te chuan thuchhuah siamin, Silchar Mizoram House-ah Mizorama bungrua phur lût tur truck Mizo khalh 16 leh hnam dang khalh 144 an tangkhang. 

October 30, Zirtawpni zan dar 11 vel khan Mizoram House-ah Assam police pathum kalin, lirthei tangkhangte chu Mizorama lut turin Assam police-in an ven theih thu an hrilh a, driver zinga eng emaw zatin an ringhlel chungin, Assam police venna hnuaiah Mizoram pan turin an tlân chhuak ta a ni. Assam police-te chauh chu ring ngam loin Silchar DRC Saizikpuii chuan Mizoram House-a duty lai Mizoram police pakhat leh SRPF pathum a kaltir ve bawk.

Silchar aṭanga zuitu Assam police pathumte chuan Sonabarighat thleng an hruai a, chuta ṭang chuan police dang paliin Kabuganj thleng an hruai a ni. Kabuganj bak chu an area a nih loh avangin an hruai zui duh lo a, anmahni inngaihtuah mai tur leh ṭul an tih chuan Dholai police outpiost dawr mai turin an ti a ni. Truck driver-te chuan Dholai outpost-ah vengtu an dil a, constable pathumin Lailapur thleng an zui ve leh ta a ni. Lailapur an thlenin, vengtu Assam police pathumte chu police checkgate-ah hmuh tur an awm tawh lo a, an bibo vek a ni.

Police aṭanga vengtu nei lo truck-te chu Lailapur khawtual mite'n an hual nghal a, hmanraw hrang hrang - chem, thingfâk leh lungte kengin an lo inring lâwk tih a hriat theih hle tih an tarlang a, "Mizoram police pakhat leh CRPF pathumte'n theihtawp chhuahin buaina chhuak tur an dang hram hram a, boruak ṭha lo zawk a thlen hlauhthawn thilah Silchar lamah an rawn let leh ta a ni," an ti.

Pâwl palite chuan, "Hetianga kan mi leh sate escort tiama an duh lo chung hruai chhuak a, dinhmun hlauhawma awmtira an bum chhuak hi kan dem tak zet. Mizoram sorkar hian Mizoram House-ah CRPF 10 tal min ngaihtuahsak se kan duh," an ti a; driver-te harsatna tawh chu a rang lama chingfel turin sorkar an ngen bawk.

Hetihlai hian Bairabi Joint VC, Joint YMA, MZP leh MSU hruaitute nimina ṭhukhawm chuan vaihoin kawng an dan chhung chu Tlawng lui aṭangin Assam lamah eng bungrua pawh permit nei an ni emaw ni lo emaw engmah a chhuak thla tur a nih loh thu an tarlang a, "Lawng hmang pawhin hnamdang vai te an rawn lutin an chhuak tur a ni lo," an ti.

Bairabi VC, YMA, MZP leh MSU-te chuan vai chhawr ṭhin sumdawnna kalpui mekte chu lo chawl rih turin an hriattir a, "Kawng block an phelh hma chu vai an chhawr tur a ni lo," an ti a, vaihoin inkalpawhna kawng an block chhung chu Bairabi khawchhunga vai awmte an sa him zawk nan Bairabi area-ah pawn chhuah an khap.