Mizoramin ei leh bara harsatna a tawh loh nan Sorkarin theihtawp a chhuah - FCSCA dept.

Food, Civil Supplies & Consumer Affairs (FCSCA) dept. chuan thuchhuah siamin, Assam-in kawng an dan avanga ei leh bara Mizoramin harsatna an tawh lohna atan theihtawp an chhuah thu an tarlang.

FCSCA dept. chuan Mizoramin chakkhai kan phurh luhna kawng pawimawh tak Assam lamin an dang ping mek tih tarlangin, "Hei hian ei leh bar leh kan mamawh kan phurh luh kawngah harsatna a thlen ṭhin avangin, buaina leh manganna kan tawh loh na turin Chief Minister leh kan Minister zahawm takte kaihhruaina hnuaiah theihtawpin hma lak a ni. Mipui leh sorkar, tlawmngai pawlte leh a kaihhnawih company hrang hrangte nena thawhhona ṭha tak leh inlungrualna vawiin ni thlenga kan la hmu zel hi a lawmawm hle," an ti.

Tun dinhmunah mipuiten harsatna Iian zawk an tawh loh nan Mizoram sorkar chuan oil leh gas mamawh zualpui lakluhna tur kawng dap a nih thu tarlangin FCSCA dept. chuan, "IOCL thuneitute nen theihtawpin hma lain Manipur leh Tripura aṭangin chawkluh dan a ruahman a, Manipur state-a Sekmai Bottling Plant leh Malom Oil Depot aṭanga phurhluh turin hun rei lote chhungin IOCL pawhin ruahmanna a rawn siamfel a ni," a ti a, October 30, 2020 khan lirthei LPG phur tur ṭhenkhatte chuan Aizawl an chhuahsan thu an sawi.

FCSCA dept. chuan sorkar hmalaknaah hian IOCL, Manipur sorkar, tlawmngai pawl, association hrang hrangte leh sorkar hotute ṭawiawmna leh ṭanpuina nasa tak an dawn thu sawiin, "Kan lawm hle  ani. Tin, Mizoram chhung leh Manipur hmun hrang hrang aṭangin kan tlawmngai pawlte leh Zohnahthlak unaute aṭangin duhsakna awka leh ṭawiawmna kan dawng zel te hian min ti thlamuangin chakna min pe thar ṭhin a; oil leh gas phur tur a chhuak driver-te tan pawh a thlamuanthlak kan ti hle," a ti.

Hun harsa leh khirh Mizoramin a paltlang laiin sorkar ruahmannate leh thupekte ṭha taka zawm tur leh harsatna siam lo tura mipuite ngenin FCSCA dept. chuan, "Mipuite tana harsatna thlen zawng leh sorkar hmalaknate tiṭhuanawp zawnga mimal emaw pawl anga hma la an awm chuan sorkarin dan hmangin na takin a chhanglet zel ang," a ti a, mipuite harsatna ti zangkhaia sukiang zel turin mipuite tan sorkar ding tlatin, theihtawp a chhuah zel dawn thu a sawi.