Special Handloom Expo buatsaih

Zoram Industrial Development Corporation (ZIDCO) Ltd. chuan nimin khan Dawrpui Multipurpose Centre-ah buatsaih Special Handloom Expo 2019 an buatsaih ṭan a, ZIDCO managing director Lalramsanga Sailo-in a hawng.

Lalramsanga Sailo chuan, ZIDCO leh puantahin inzawmna thûk tak an neih thu sawiin, "Kan ramin handloom lama hma kan sawn chhan pakhat chu ZIDCO hnathawh rah a ni. Tun thlengin ZIDCO kaltlang hian mi tam takin eizawnna ngêlnghet an nei tawh. Kan ramin border trade centre hmun hrang hrangah a nei a, kan puantahte hi kan trade centre aṭangin thawn chhuah a, sumdawnna lian zawk kalpui theihna tura kawng a inhawn hun a nghahhlelhawm hle a ni," a ti.

Lalramsanga Sailo sawi danin, Ministry of Textile-in 4th. Handloom Census a buatsaihah Mizoram chhunga puan­tah leh a kaihhnawiha inhmang mi 28,539 an awm a ni.

Special Handloom Expo hi Ministry of Textile hnuaia National Handloom Development Programme (NHDP) bul­tuma buatsaih a ni a, stall 30 hawn niin, March 28, 2019 thleng a awh ang.