KHAWTHLIR

October 31 kha Assam chief minister Sarbananda Sonawal pian champha a ni a, chief minister Zoramthanga chuan Twitter kaltlangin lawmpuina a hlân. Zoramthanga hian Sarbananda Sonawal lawmpuina a hlan pah hian, ṭul lo taka ramria buaina awm chu reh tawh se a duh thu a tarlang a ni.

October 31, Inrinni khan KṬP, Thakthing Branch chuan an kohhran hall-ah thisen pek rûnpui an huaihawt a, mipa 28 leh hmeichhia 15-te'n Civil Hospital blood bank tan thisen unit 43 an pe. YLA, Lawngtlai Bethel Branch pawhin Lawngtlai District Hospital tan thisen unit 27 an pe a, a petute mipa 23 leh hmeichhia pali an ni.

Aizawl South-II bialtu MLA Lalchhuanthanga leh ZPM hruaitute chuan October 31, Inrinni khan Vairengte leh Saihapui-V an tlawh. Lalchhuanthanga chuan ramria duty-te chu lawmthu hrilhin, "Nangmahni avangin Zoram mipuite tui takin kan mu thei ṭhin a ni," a ti. MLA leh ZPM hruaitute hian Vairengte Joint VC, Saihapui-V VC leh Zoram Drivers' Union hruaitute hnenah Rs. 5,000 ṭheuh an pe a ni.

Hnahlan Welfare, Aizawl chuan thuchhuah siamin, an member Sangliansiama, Republic Vengte chhungkuaa mi panga, January 9, 2015 zana thattua puh Laltlanchhuaha, Republic Veng chu a phû tâwka hrem a nih ngei theihna tura Republic Veng mipui hmalakna leh an duh dan chu an thlâwp thu an tarlang. "Republic Veng mipui chauh ni loin, Mizo mipui rilru a ná a, khatianga tualthahna kha Mizoramah a la thleng ngai lo. Kan rilru a na tàwp thei lo a ni," an ti.

State Referral Hospital (ZMC)-ah Covid-19 vei enkawl mi 72 an awm mek a, an zinga paruk chu nimina dah luh thar an ni. SRH-ZMC Bulletin tarlan danin, hripui vei mi 72 zinga panga chu ICU-ah enkawl niin, mi dang zawng Isolation Ward-ah an awm. ICU-a awm mi panga  zinga pahnih chu ventilator hmantir an ni a, pathum chu oxygen pek an ni bawk. Ward-a awm zingah ngaihtuahawm an awm lo.