Sorkar laipui aṭangin Mizoramin Beisei ang sum a dawng thei
Mizoram sorkar chuan financial year thar, kum 2021-22 chhunga sum hmuh tur a beisei lâwk angin sorkar laipui aṭangin a dawng thei rih. Kum 2020-21 chhung khan ruahman lâwk angin Mizoram sorkarin sum a dawng lo thung.
Vanglaini palai zawhna chhangin Finance comissioner Vanlalchhuanga chuan, beisei lâwk angin sum an la dawn thu a sawi a, "Kum 2020-21 ah pawh khan thla hnih/thum chhung vel chu beisei angin pawisa kan dawng a, mahse, hun a kal zel a, kan dawng tlem telh telh. Covid-19 a hluar thar leh si a, beisei angin pawisa kan dawng ang em tih hriatthiam a har khawp mai," a ti.
Finance Comissioner chuan, sorkar laipuiin chhiah a hmuh ṭhat leh hmuh ṭhat lohah sum dawn zat tur a innghah thui thu sawiin, "Covid-19 a hluar thar leh avang hian sorkar laipui pawh hian an beisei lâwk ang chhiah an hmu kher ang em tih hriat a ni lo," a ti a; sum leh páia hma lam hun tur sawi lâwk thiam a har thu a sawi.
Beisei anga sorkar laipui aṭanga sum hmuh a nih chuan sum dinhmun a ziaawm chhoh deuh tur thu sawiin Vanlalchhuanga chuan, "Chutih rualin, kan beisei angin pawisa hmu mah ila, nikum lama beisei ang kan hmu lo nasa lutuk khan min nghawng chin a la awm lo thei dawn lo," a ti.
Kum 2021-22 fiscal year-ah hian sorkar laipui aṭanga state-in sum a hmuhna hnár lian ber, chhiah tlingkhawm (Share of Central Taxes) aṭanga Mizoram sorkarin a hmuh tura a beisei chu cheng vbc. 3,327.82 a ni.
Budget session hnuhnung bera chief minister Zoramthanga, Finance changtuin a tarlan danin, kum 2020-21 chhung khan Share of Central Taxes aṭanga hmuh tura beisei chu cheng vbc. 1,185-in Mizoramin a hmu tling lo a ni.