April 2021-ah Covid-19 positive Mi 614 hmuh chhuah a ni tawh

Mizoramah tun hnai ni hnih (April 19&20) chhungin Covid-19 hripui vei mi 181 hmuh chhuah tawh a ni. April thla bikah hian positive 614 hmuh chhuah a ni tawh a, hei hi thla khat chhunga hmuh zat tam lamah palina a tling tawh.

Tun April thla, ni 1-20 chhunga Covid-19 positive hmuh chhuah zat 614 hi chawh rualin, ni tin mi 30.7 zel hmuh chhuah ang a ni a; nikum lama thla khata chawhruala hmuh chhuah tam ber thla, November a pha ṭêp tawh a, nimina swab sample endik chhiar telin tun thlaah ni 10 a la awm.

Mizorama Covid-19 positive hmuh chhuah tam ber thla chu November a ni a, mi 1,089 hmuh chhuah a ni a, September thlaah mi 900 chuang leh October thlaah mi 700 chuang hmuh chhuah a ni bawk a; hengte hi kumin April 1-20 chhunga positive hmuh zatin a la phâk loh thlate a ni.

Kumin January-March, thla thum chhungin Covid-19 vei mi 260 hmuh chhuah a ni a, hei hi April 1-20 chhung ringawta hmuh zat 614-in 354-in a khûm tawh.