MP-ah Covid-19 vei Mizo a thi
Madhya Pradesh-a Mizo pastor missionary Rev. V Lawmkima (70), Venghlui, Aizawl chu nimin chawhma dar 10:05 khan Covid-19 avangin All is Well Hospital, Burhanpur, Madhya Pradesh-ah a thi. Nimin vêk khan vui a ni a, Kanapur-a TBZ Mission Compound-ah phûm a ni.
February 1, 1951-a piang Rev. V Lawmkima hi Mizoram Presbyterian Kohhrana pastor/ minister a ni a, kum 2011-ah a pension. Kum 2018 khan Thlarau Bo Zawngtute (TBZ) zawmin, Jamshedpur, Jharkhand-ah a awm ṭhin a, kumin January thla khan Madhya Pradesh-ah field director-in a awm. Covid-19 a vei tih April 3, 2021-ah hmuh chhuah niin, All is Well Hospital, Burhanpur-ah enkawl a ni a, nimin khan a thi ta a ni.
Thu dawn danin, Jamshedpur aṭanga Madhya Pradesh-a awm tura insawnpui tura kal ve a nupui Lalrinpuii pawhin Covid-19 a vei a, damdawi-inah enkawl mek a ni.