MNF-in Campaign Kick-Off hun an hmang : NDA kan nihna hi kan zêp lo - Zorama

MNF chuan nimin khan Vanapa Hall-ah April 11, 2019-a Lok Sabha inthlanpui leh Aizawl West-I Assembly bye-election neih tura an candidate-te pualin campaign kick-off an buatsaih. Inkhawm hi MNF treasurer Vanlalzawma'n a kaihruai a, MNF president Zoramthanga chuan, NDA an nihna chu an zêp loh thu a sawi.

MNF President chuan, sorkar an siam hnua MP inthlan leh MLA bye-election a awmin mipuiin ngaihdan an siam fel tawh ṭhin nia sawiin, "Zoram mipui hian mi kan hmantlak lai hun leh ṭangkai hun hisâp dan an nei a ni," a ti a; MP inthlan leh MLA bye-election-ah an party-in hnehna an chan ngei tur thu a sawi.

Zoramthanga chuan, MP inthlana inkhing ber tur chu MNF leh ZPM an nia sawiin, "MNF hnathawh chin an en a, anni tan sawi tur a váng hle. 'MNF-te NEDA-ah an awm a, BJP nen an thawkho' tih chu an aupui ber a ni. NDA leh NEDA hi sawi hran theih a ni lo a, NDA kan nihna hi kan zêp hauh lo. July 2014 khan NEDA member kan nih thu Prime Minister hnenah MNF, ZNP, MPC leh MDF president-te'n hming ziakin kan thlen a, a bak hmasawnna kan nei lo," a ti.

MNF President chuan, MLA bye-election-ah ruling party candidate thlan tlin a pawimawh tih sawiin, "Eptu bial dang pawhin bye-election neih an châk a, mahse, a theih loh. In thlênga in chawi luau luau hi in thlauh buak vaih chuan a pawi ngawt ang, ruling nih in mamawh ve êm," a ti a; ruling party MLA nei ngei turin thutlukna dika kal turin mipui a chah.

ZPM-te chuan zu zuar an thawhpui nia sawiin MNF President chuan, "Sawi mawi ngaihna an hre lo a, issue base-in kan kal an ti a, tumahin kan awih lo. Thingtlang mipuiin issue base an hre lo a, an hriat chu zu vanga hmeithai tamzia leh nunna chán tamzia a ni," a ti a; zu zuar party thawhpui chu sawi mawi ngaihna a awm lo niin a sawi.

Zoramthanga chuan, BJP mi leh sa eng emaw zat an lawm lut tawh a, lawm luh tur an la nei tih sawiin, "An headquarters hruaitute pawh an mangang deuh a ni ang, bye-election-ah MNF kan vote dawn te an ti. Thawk dun turin vawi khatmah kan inbe lo, chuti chunga min rawn ràlkhat 'star' chuan a lawmawm. Kan candidate min vote-pui tur chuan sual ber, a ṭawp ber pawh kan duh vek," a ti.

Inkhawmah hian MNF President chuan political party hrang hrang aṭangin mi eng emaw zat a lawm lut a; chu'ng zingah chuan MLA inthlan neih zawh tâka Dampa biala ZPM candidate leh Hachhek biala BJP candidate-te pawh an tel.