FC-ah Mizoramin cheng vbc. 94,647.33 a díl

15th. Finance Commission (FC) hotute chu Marh 25, Thawhṭanni tlai khan Chief Secretary pisa conference room-ah chief secretary Lalnunmawia Chuaungho leh Mizoram sorkara hotu dangte nen an inkawm a; Mizoram sum mamawhte an sawiho. FC hnenah hian Mizoram sorkarin cheng vbc. 94,647.33 a lo díl.

15th. FC hotute hi chairman NK Singh, member pahnih AN Jha leh Dr Ashok Lahiri bakah, member secretary Arvind Mehta te an ni a, Aizawlah zan khat riakin, nimin khan Mizoram an chhuahsan. Mizoram tiamin 1th. FC hian state 20 an tlawh tawh.

Mizoram sorkar hotute nen an inkawmnaah Mizoram sum mamawhte leh mamawh chhante sawifiah a ni a; a hnu­ah khawpui inrêlbawlna leh enkawlna dinhmun sawiho niin, a chhawng thumnaah village council tihchangtlunna atana sum mamawhte sawiho a ni.

15th. FC chairman NK Singh chuan, inkalpawhna, tou­rism, social infrastructure leh khaw­pui nun urbanization-te ngaih pawi­mawh bik a ṭul thu a sawi a, "Mizoram sorkarin sum mamawh a dil leh a thlente hi Commission-in rilru zau tak pu chungin ngaih­tuahin rawtna a siam dawn a ni," a ti.

CS Lalnunmawia Chuaungo chuan, kum 20 chhung Mizoram a buai avangin Mizoram chu a hnufual bik tih sawiin, "Hma­sawnna ruhrelah te, inkalpawhna lamahte leh thil dehchhuah lamahte kan mamawh angin hma kan sawn chak thei lo," a ti a, Mizoram sorkarin mamawh a thlente chu rilru zau tak pûa ngaihtuahsak turin FC hotute a ngen.

Finance secretary Lalmal­sawma'n Mizoram sum leh pai dinhmun leh sum mamawh dante a sawifiah a; Mizoram economy dinhmun, sorkar sum hnár leh sum hmanna hrang hrang, state leibá leh leiba rulh dan, revenue leh capital expenditure inthlauh dante chipchiar takin a tarlang.

Kum 2020-2025 chhunga sorkar sum mamawh, hmanna tur leh sum hnar awm thei thlir lâwkna projection chu FC hnenah thlen a ni a; leiba tihhniam kawnga Mizoram Fiscal Responsibility & Budget Management Act, 2006-in a phût angin an tih mek thu an sawi. Khuarel chhiatna, a bik takin leimin leh tlahniam a tam avangin State Disaster Relief Fund leh State Disaster Mitigation Fund atan sum pe tam turin an ngen bawk.

Meeting chhawng hnih­naah UDPA secretary Dr C Vanlal­ramsanga’n urban local body-te dinhmun leh sum mamawh chungchang a sawifiah a; a chhawng thumnaah LAD secretary Zoramthangi Hauhnar-in rural local body-te sum mamawh a sawi thung.