MNF leh BJP hi thuhmun an ni - Lalduhoma

ZPM leader Lalduh­oma chuan, Lok Sabha inthlanpui awm turah BJP leh MNF-te chu thawk dun ni mai loin, thuhmun an nih thu a sawi a, "MNF an tlin chuan NDA-in MP an neih belh dawn a, BJP thlan tlin nen a inang reng a ni," a ti.

Lalduhoma hian nimina Seling, Keifang, Saitual, Dulte leh Khaw­zawla ZPM leh Congress-in an thlawp MP candidate Lalnghinglova Hmar a campaign-puinaah thu sawiin, "NDA hi Mizo mipuite'n kan hriat chian a ngai a, BJP-in a din, BJP sorkar theihna tura din a ni," a ti a; Mizoram aṭanga BJP sorkartir tuma hma laah MNF chu puhin, Mizo mipuiin an duh lo chunga NDA an ni lui tlat chu vanduaithlak a tih thu a sawi.

India rama Hindu lal ram din tumtute MNF-in an thláwp chu mak a tih thu sawiin Duhoma chuan, "Nationalist ber tura ka ngaihte a ni lo lam hawia an kal hi Pu Laldenga kha lo tho leh se, a rilru a nat ka ring. Central sorkar sum ît vanga kan hnam tana thil pawi pawh ti duh tlat kan nei hi a vanduaithlak a, CAB kaltlang luihpui tumtu MNF-in an thláwp hi a pawi hle," a ti.

ZPM Leader chuan, inthlan chi hrang hrang leh issue chi hrang hrang a awm tih sawiin, "Tuna kan issue hi zu zawrh a ni tawh lo a, sawhthing lei a ni tawh lo a, district lam pawh a ni lo. Lok Sabha-a kan aiawh roreltu tur kan thlang dawn a, BJP lamṭang leh lamṭang lo kan bûk dawn," a ti a; BJP kaih­hruai NDA do tura intél khawm an nih thu a sawi.

Lalduhoma chuan, Lalnghinglova Hmar vote tura mipui sáwmin, "Mizo ṭhalai, a vânglai taka ram tana thawk tura pên chhuak a ni a, a kal tawhna lamah chuan vai leh sap zingah pawh zahpuiawm lo, ram vei mi a ni a, MP ṭha tak a ni ngei ang. MP atan ṭhalai viak ṭha kan mamawh," a ti.

MP candidate Lal­nghinglova Hmar pawhin thu sawiin, "He inthlan lo awm tur hi India rama roreltu tur thlanna a ni a, Mizoram inthlanna kan neih zawh tâk nen khan ngaih pawlh lo hram ila. India rama BJP an sorkar tawh lohna tura ṭangrual min vote turin party tina mipuite ka sáwm a che u," a ti a; MP ṭangkai ni tura a inbuatsaih thu a sawi.

Lalnghinglova Hmar tana campaign-naah ZPM MLA C Lalsawivunga, Cong­ress minister hlui H Ro­hluna leh MLA hlui R Vanlalvena te pawh an tel a ni.