MP danglam nih ka tum - C Lalrosanga

Lok Sabha inthlana MNF candidate C Lalro­sanga chuan nimin khan Vanapa Hall-ah campaign kick-off inkhawmah thu a sawiin, "MP danglam nih ka tum," a ti.

C Lalrosanga chuan, ram rawngbawlna atan tih theih a awm ve lo maw, tia pên chhuak a nih thu sawiin, "MLA inthlan dawnah sorkar ṭha duhin Pathian hnenah kan ṭawngṭai a, Pathianin thil mak min tihsak a, chu chu MNF sorkar a ni. Hna thawk duh, ram tana ṭhahnemngai an nihzia a lang," a ti a; MNF hnathawhah mipui an lawm niin a sawi.

State sorkar chak taka a kal chuan Parlia­ment chhung leh páwnah thawhpuitu a mamawh dawn tih sawiin Lalrosanga chuan, "Ruling party MP neih hi kan mamawh leh thil ṭul tak a ni. MP ka nih chuan Isua vangin MP danglam bîk nih ka tum," a ti.

C Lalrosanga chuan, politics kalphung ṭhatna tur leh ram an vei thute vawi tam tak an lo sawi tawh ṭhin tih sawiin, "Rawngbawltu ni ve ṭhin politics-a luh chu a hrehawm ve khawp mai," a ti a; sawi sawi ringawta luhchilh si loh chuan an thusawite chuan a nih tur ang a nih dawn loh avangin politics-ah a zuang lut tih a sawi.

Aizawl West-I MLA bye-election-a MNF candidate Zothantluanga pawhin thu sawiin, Lal­duhoma'n Aizawl West-I a chhuahsan chhan a ngaihtuah ṭhin thu a sawi a, "A awmna bial, an in leh lo awmna bial a chhuah-san hian bial a hmangaih lohzia a tilang nia sawi an awm ṭhin," a ti.

Ngun taka ngaihtuahin Serchhip chu CM-in term hnih a bial a, hmasawnna hna thawh vak a ngaih tawh loh avangin, an bial chuan hmasawnna tur an ngah avangin ruling bial ni turin Lalduhoma chuan West-I a chhuahsan nia a hriat thu sawiin Zothantluanga chuan, "CM leh minister-te'n an thawhpui duh MLA kan bial hian kan neih a ngai," a ti a; thlan tlin a nih chuan bial tan theihtawp a chhuah tur thu a sawi.