MPCC-in C Lalrosanga kan sáwm lo - Congress

Mizoram Pradesh Congress Committee (MPCC) chuan thu­chhuah siamin, Lok Sabha inthlan tura MNF candidate C Lalrosanga'n MP candidate atan amah chu Congress party-in an sáwm nia a sawi chu thu dik lo a nih thu leh, Congress party-in an sàwm loh thu an tarlang.

Congress party chuan, MPCC Nomination Co­mmittee-in MP candidate chungchang ngaihtuaha an meeting-naah C Lalrosanga hming lam rîk a ni miah lo tih an sawi a, "Party aṭanga mi ṭhahnemngai ṭhenkhatte'n an lo sáwm a nih chuan, Congress party chuan a hriatpui lo a, official-a sàwmna a awm lo," an ti.

C Lalrosanga'n tun hnaia Darlawn tlangdung a tlawhnaah, thla thum chhung MNF sorkar leh kum 10 chhunga Congress sorkar hnathawh a inhen deuh thaw anga a sawi chungchangah MPCC chuan, "Mi mâwl ber pawhina an awih loh tur thu a sawi ta mai leh, mihlim inti ká aṭanga dâwt thu a lo chhuak ta mai hi mak kan tiin, pawi kan ti," an ti a; poli­tics a nih vanga dâwt thu hmanga mi dang sawichhe tawh lo turin C Lalrosanga chu an chah.

MPCC chuan, Cong­ress sorkarin ram tan rotling hmasawnna hna a thawh ṭhenkhat - Referral Hospital/medical college, Tuirial HEP, etc. te chu thla thum chhunga thawh zawh chi a ni lo tih sawiin, "Chu mai pawh ni loin, MNF sorkar kum 10 chhunga sum thianghlim lo ûm vanga tihhlamzuih an ni zawk," an ti. Kum 10 chhungin Congress sorkarin ṭhalaite infiamna atan phûl lem hmun 10 chuangah an siam laiin, MNF sorkar hmasain kum 10 chhungin artificial turf pakhat pawh an hnutchhiah lo tih an sawi.

Congress party chuan, "Tun kum 10 chhunga Congress sorkar hnuaia sorkar hnathawkte'n rinawm taka an hna­thawhte hna thawk ṭha lo anga ngaih theih tura kum 10 kal ta chhung aia MNF sorkarin thla thum chhungin hna an thawk ṭha tia a sawi ta hi sorkar hnathawkte hmuhsitna lian tak a ni," an ti a; politics a nih vanga lang chhuak leh mai tur dâwt thu hmanga inbeih chu Pathian rawngbawltu, mihlim inti tan phei chuan a mawi lo leh zual tih sawiin, "MP ni tlak loah kan ngai a ni," an ti.