Zokhawthar aṭanga bungraw phurte dang

Champhai Trade Union hnuaia All Vehicles Association, bungrua phur bikte chuan nimin aṭang khan Zokhawthar aṭanga bungraw phur lirthei Champhai lam pante chu tiam chin awm loin an dang ṭan.

Thu dawn danin, March 20, 2019 khan All Vehicles Association chuan bungraw phur Zokhawthar lam pan leh Champhai lam pan, Zokhawtharin hlâwkna a neih theihna tura an hriatte chu Mualkawi dáiah dan ni se tiin an rêl a; an thurel bawhzuiin nimin zing dar 6 aṭang khan Mualkawi daiah an duty ṭan a, Champhai leh Zokhawthar inkara bungrua phurte an dang a ni.

All Vehicles Association-in thu­chhuah siama an tarlan danin, hun rei tak aṭangin Zokhawthar Welfare hnenah donation pek ṭhin a ni a, sum chhûn luh zat tur chu kum tin ennawn a ni ṭhin.

Kumina an donation chungchangah ngenna an siam chu Zokhawthar Welfare-in pawm loin, donation pek zat ennawn turin tumah an kal duh lo a; chuvang chuan All Vehicles Association chu thawhhona aṭanga inhnûkdâwkin, donation an pek tawh loh tur thu Zokhawthar Welfare an hrilh a ni.

All Vehicle Association chuan, Zokhawthar Welfare-in lirthei neitute ráwn loa bungraw man an tihsansak ṭhin chu an duh loh thu an tarlang bawk.