MP candidate-in MZP Pisapui a tlawh

Lok Sabha inthlan awm tura Congress party leh ZPM-in an thlàwp mipui candidate Lalnghinglova Hmar chuan March 25, Thawhṭanni khan MZP Pisapui a tlawh a, MZP hruaitute nen an inkâwm.

MZP president L Ram­dinliana Renthlei chuan, an hriat theih chinah Lal­nghinglova Hmar chu MP candidate zinga a hranpaa MZP pisa tlawh hmasa ber a nih thu a sawi a, "Hetianga appointment siam thlapa min tlawhtu MP candidate hi kan la nei ngai lo," a ti.

MZP President chuan, an pawlin a ngaih pawimawh leh ngaimawh hrang hrangte chu - Citizenship Ammendment Bill (CAB), Zo fate inpumkhatna, ramri buai chinfel leh zirnaa hmasawnnate a nih thu a sawi.

Lalnghinglova Hmar pawhin thu sawiin, CAB chu a duh lo mai ni loin, CAB duhtute pawh a duh lo tel tih a sawi a, "CAB duh lotute lamah hian bán ka phar dawn. MZP duh loh hi kei pawhin ka duh loh a ni a, min thláwptu party pahnih pawhin an duh lo hle a ni," a ti.

Ramri buai chinfel danah MP a nih chuan thuneitu sang zawkte sawipui a duh thu sawiin Tetea Hmar chuan, "Tunah hi chuan SP leh DC level-a indâwrna hi a ni deuh zel a, thuneitu sang chinin an buaipui a ngai a ni," a ti a; ramri chu zirlai pawl, MP leh sorkar hotu lu lamin an buaipuina tur zawn a âwm thu a sawi.

Lalnghinglova chuan, ṭhalaite eizawnna a ngaih pawimawh thu leh sorkar hna­thawk tur ringawta inzir ṭha a tih loh thu sawiin, "MP-a thlan tlin ka nih chuan sorkar laipui, corporate leh PSU-te kaltlanga hnathawh tur ṭhalaite siamsak theih ka inbeisei," a ti.

Ṭhalaite khawvel a nih angin ṭhalaite tan MP nihna hun remchang inhawng chu bawhpelh loh a duh thu sawiin Lalnghinglova chuan, "Ṭhalaite hmakhua ngai chunga mi tin huapa hna thawh ka tum," a ti a; ṭhenawm state pawhin MP ṭhalai zawk an neih theih chuan, Mizo ṭhalaite theihnain a tlin lohna tur a hriat bik loh thu a sawi.