Justin Bieber-a'n music a chawlhsan rih dawn

Tun hnaiah harsatna eng eng emawin a tlak buak a, a rilru leh taksa a inpeih loh avangin music khawvelah hun eng emaw chen chu kan hmu rih dawn lo. Candian singer lar Justin Bieber chuan chhungkua a ngaihpawimawh thu sawiin, a hriselna dinhmun a ṭhat chhoh leh hma chu music chawlhsan rih a tum thu a sawi a, eng chen nge a chawlh dawn erawh a sawi lo.

'Love Yourself' singer hian hemi chungchang hi tun hnai khan social media kaltlangin a puang a, fans lam pawh an hrilhhai hle. JB chuan, "Rilru leh taksa a inpeih lo a, kan inneih chungchangah kan buai hle bawk. Dawh thei takin min lo nghak rawh u, ka lo kir leh thuai ang," tiin, a tarlang a, fan-te chu dawh thei taka nghak turin a ngen.

Hailey Rhode Bieber pasal Justin Bieber chuan, "Album thar inbeisei tih ka hria a, ngenna pawh ka dawng hnem hle. Amaherawhchu chawlh hahdam rih ka mawhmawh a, ṭha zawkin ka lo kir leh dawn a ni," a ti. "Music hi ka tan chuan ka engkima engkim a ni a, chutih rual chuan ka chhungte leh keima hriselna dinhmun hi ka ngaihpawimawh rih a ngai a ni," a ti bawk.

Kum 25 mi Justin Bieber hian thla hmasa khan harsatna a tawh thu hi a lo sawi chhuak tawh bawk a, chawl rih turin thutlukna a siam ta a ni.