Mizorama Covid-19 vei zingah A chi thar kái hmuh a la ni lo

Health & Family Welfare minister Dr R Lalthangliana chuan, Mizoramah Covid-19 chi thar - UK variant (B.1.1.7), South African variant (B.1.351) leh Brazilian variant (P.1)) vei hmuh chhuah a la ni lo tih a sawi.

Vanglaini palai zawhna chhangin Health Minister chuan, Mizorama Covid-19 vei hmuh tawhte sample chu National Institute of Biomedical Genomics (NIBMG), West Bengal-ah thawn ṭhin a nih thu a sawi a, "Result kan dawn tawh chinah chuan Covid-19 chi thar kái an la awm lo. Sample thawn tawh, result hriat loh a la awm. Laboratory nazawngah endik theih a nih loh avangin an che chak thei lo a nih hmel," a ti.

Covid-19 state nodal officer Dr Pachuau Lalmalsawma'n Vanglaini a hrilh danin, NIBMG-ah hian sample 326 thawn a ni tawh a, result hriat tawh 69-te chu Covid-19 chi thar a ni lo vek. Covid-19 chi thar finfiah theihna hi India ramah hmun 10-ah a awm a ni.

Covid-19 hri thar lênna hmun aṭanga Mizorama rawn lutte chu swab sample endikah negative mah se, Berawtlangah khung hran nghal zel an ni a, ni sarih hnuah RT-PCR hmangin an sample endik leh ṭhin a ni.

Dr R Lalthangliana chuan, April 20 khan Covid-19 vaccine dose 1,00,000 a rawn thlen thu sawiin, "A tam thei ang ber chak taka pek ṭul kan ti a, Union Health Minister pawh biain, kan duh dan hi ka thlen tawh," a ti a; vaccine chu chatlak loa a rawn thlen theih zel an beisei thu a sawi.

Health Minister chuan, Prime Minister-in May 1 aṭangin kum 18 chin chung lamte vaccine pek tur tia a puan chu Mizoramah pawh kalpui ve ngei an tum thu a sawi a, "Rokhawlhna a awm a nih loh chuan kum 18 chin hi pek ve theih kan inring. Chutiang tur chuan kan inbuatsaih a, mahse, hriat lâwk loh harsatna a awm ve thei bawk," a ti.

ZMC-ah RT-PCR khawl pathum hmangin swab sample endik ṭhin a nih thu sawiin Minister chuan, "RT-PCR hmanga sample endik tura thil ṭul hrang hrangte tun hmain ICMR aṭangin kan dawng ṭhin a, tunah chuan kan dawng tawh lo. Chuvangin, ICMR hotute hnenah ziak leh telephone hmangin min pe leh turin ka ngen," a ti a; a ngenna chu ICMR-in tihhlawhtlin ngei an tuma a hriat thu a sawi.