KHAWTHLIR

Thisen pe
Kolasib College NSS unit-te chuan nimin khan Kolasib District Hospital blood bank-ah thisen pek an huaihawt a, thisen unit 17 an pe. Thisen petute hi mipa 12 leh hmeichhia panga an ni. Mizoram Medical Representatives Association pawhin April 21, Nilaini khan an din champha pualin Aizawl Civil Hospital blood bank-ah thisen unit 34 an pe a, petute mipa 29 leh hmeichhia panga an ni.

Thlen theih loh
General Administration department chuan nimin khan hriattirna chhuahin, Delhi-ah Covid-19 a darh nasat avangin Vasant Vihar leh Chanakyapuri-a Mizoram House-ah medical emergency leh House thuneitute'n rem an tih ni lo mikhual thlen phal a nih rih loh thu a puang. GAD chuan, hripui leng a ziaawm hma chuan ṭul tàwpkhâwkah lo chuan Delhi-a zin lo turin Mizoram mipui an ngen a ni.

Mi 106 man
Covid-19 lêng invenna leh himna atana Mizoram sorkarin dan a siam bawhchhia April 21, Nilaini khan Aizawl district-ah mi 106 man an ni a, chung mite pawisa chawi belhkhawm chu Rs. 12,800 a ni. Sorkar thuchhuah tarlan danin, dan bawhchhia mante chu hmai tuam lo, inhnaih tak taka awm, vantlang hmuna chil chhâk leh inkhawmnaa záite an ni.

Tanpuina hlan
ZPM Southern Hqrs vice president Lalrinpuii chuan nimin khan Lunglei Electric Veng a tlawh a, vawk thite tan ṭanpuina khawtlang hruaitute hnenah a hlân.

MZU chhuang
Higher & Technical Education minister Dr R Lalthangliana chuan, UN SDGs hnuaia International THE Rankings-a zirna-in 1,115 thlan zingah Mizoram University a tel leh India hmarchhak biala lang awmchhun a ni chu chuanawm a tih thu a sawi. Minister chuan nimina Secretariat-a meeting-ah, "University naupang takin hetiang dinhmun a thleng hi a ropui hle. Covid-19 leng kara MZU Vice Chancellor leh a thawhpuite thawhrimna a fakawm tak zet a ni," a ti.

MPSC-in sût rih
MPSC chuan hriattirna tichhuakin, Covid-19 lêng avangin April 27-29 chhunga neih tur Programme Coordinator written exam te, April 30-a neih tur Asst. Director of Fisheries /District Fisheries Development Officer personal interview leh, April 20 aṭanga May 3 inkara Inspector of Excise diltute tana document thehluh tura tih chu sût rih a nih thu a tarlang. Thuthar a awm chuan MPSC website https://mpsc.mizoram.gov.in leh mobile application MIPUSEC-ahte tarlan a ni ang.

Kuhva rah man
Assam Rifles leh Champhaia Custom Preventive Force-te chuan April 21, Nilaini khan Champhai-Mualkawi kawngah dan loa Myanmar aṭanga lâk luh kuhva rah ip 50 an man a, Rs. 12,72,000 hû a ni. April 20, 2021 khan Khawbung ram chhungah Rs. 2,14,52,280 hû kuhva rah ip 954 an lo man tawh bawk.

ICU-ah mi 4 awm
State Referral Hospital-ah nimin khan Covid-19 vei mi panga dah luh an ni a, anni nen SRH-ah hripui vei mi 35 enkawl mek an ni. SRH-ZMC Bulletin tarlan danin, mi 35 zinga pali chu ICU-ah enkawl niin, an zinga pahnih chu ventilator hmantir an ni a, mi 31 chu ward-ah awmin, harsatna lian tham nei an awm lo.