Kuhva rah tawlh rûk a tam : Champhai leileta kudamte endik a ni lo

Champhai leh Khawzawl district kaltlanga Myanmar aṭanga kuhva rah tawlh ru an tam a, kuhva rah, a phurtu lirthei leh mihring eng emaw zat man a ni tawh. Hetih lai hian, Champhai leilet zawla kuhva rah dahkhawmna nia hriat in/ kudam ṭhiahna tur thupek chhuah ni tawh mah se, ṭhiah a la ni lo hlawm a; endik a la ni lo bawk.

Champhai bawrhsap Maria CT Zuali chuan, kuhva rah tawlh rûk a tam thu Vanglaini a hrilh a, "International border paltlang a nih avangin lo man pawh ni ila, Customs hnenah kan hlan zel a ngai a, keimahni'n kut kan thlak ve thei lo," a ti.

Maria CT Zuali chuan, state sorkar hnuaia thawkte'n kuhva rah an man tawhte chu Customs hnenah an hlan zel thu sawiin, "PMGSY kawng laihte an zawh nasa tih kan hria a, man pawh kan nei nual tawh. Mahse, dan loa kuhva tawlhtute hian khaw ṭhenkhata khawtlang hruaitute pawisa pein an tham ṭhin niin kan hria a, man a harsat phah ṭhin," a ti a; ramri vengtu an nih loh avangin khawi aṭanga lo lut nge an nih hriat a har thu leh ramri paltlang tawh, kawng hrang hrang zawha kalte ûm zuia duty a buaithlak thu a sawi.

Champhai leilet záwla kuhva rah dah khawmna kudam 50 vel chhin­chhiah a ni a, chu'ngte chu ṭhiat turin Champhai Bawrhsapin thupek a chhuah tawh a; tun thlengin a la ding hlawm thung.

The Customs Act, 1962 Chapter XIII Section 110 leh 111 hmangin Customs Preventive Force (CPF)-te chuan kudamte chu an enfiah thei a, dan loa thil tite pawh an hrem thei a ni. Mahse, kudamte chu ram dang aṭanga dan loa Myanmar aṭanga lak luh vengtu, Champhai CPF-in an la enfiah lo a, enfiah tura hmalakna pawh a la awm lo.

Vanglaini palai zawhna chhangin Champhai CPF hotute chuan, kudam enfiah turin an hmunpui aṭangin phalna neih a ngai niin an sawi a, "Kudamte hi mimal ta a nih avangin keimahni thuin kan khawih thei lo. Dan leh a kaihhnawih a tam a, Shillong lama kan hotute aṭangin raid permit (endik phalna) kan neih a ngai. Kuhva tawlh ru an tam si a, permit nei pawh ni ila, buaina kan chawh chhuah theih avangin security ngaihtuah tel a ṭul a, a buaithlak hle," an ti a; an hmunpuiah raid permit an la dil loh thu an sawi.

CPF hotute chuan, Champhai district leh Khawzawl district an enkawl tih sawiin, "Thawktu kan tlem avangin duty reng a harsa. Kuhva rah mante chu a ṭha ho auction (lilâm) turin Aizawlah kan thawn a, a chhe ho chu leiah kan phûm mai ṭhin," an ti.

Hetih lai hian, April 15, 2021-a Khawzawl DC Zothanmawia hoa district SP, 2nd IR Commandant, PWD executive engineer, Champhai DLAO, Khawzawl Sub-Hqrs. YMA hruaitute leh kuhva rah phur lirtheiin a paltlang VC-te ṭhukhawm chuan, an district kaltlanga kuhva rah phurh ṭhin tihtàwp a nih theih nan thawhho an rêl.

Khawzawl Bawrhsap chuan, kuhva rah an man fo thu Vanglaini palai a hrilh a, "Police kan ngah loh avangin man hman loh pawh kan ngahin kan hria. Kan mante chu Champhaia Customs ho hnenah kan hlân ṭhin," a ti a; kuhva rah phur lirthei zingah Mizoram registration nei an tam thu a sawi.