SDGs International THE Rankings-ah Mizoram University a lang pha

United Nations hnuaia ram hrang hranga kalpui mek Sustainable Development Goals (SDGs) hnuaia hma­laknaah Mizoram University chu khawvel puma zirna-in sang (university) ṭha tehna Overall International THE Rankings-ah a lang.

UN SDGs hnuaia khaw­vela zirna-in ṭha thlanna, International THE Rankings-ah hian zirna-in 1,115 thlan chhuah a ni a, chu'ng zingah chuan MZU chu 601-800 inkarah a lang a; India hmachhak state huam chhunga university lang awm chhun a ni.

MZU hi UN SDGs point 17 awmah point parukah a lang pha a; SDGs pakuana, 'Industry, Innovation and Infrastructure' category-ah phei chuan rank 101-200 ah a lang. SDGs 17-te chu UN 2030 Agenda for Sustainable Development hnuaia mi a ni.

Tehnaa dinhmun (ranking) hi Times Higher Edu­cation-in an tihchhuah a ni a, anni hian World Impact Rankings 2021 pawh tun hnaiah an tichhuak a ni. Zirna-inte chu tehfung hrang hrang - UN SDGs hnuaia research output, outreach leh stewardship hmanga teh a ni ṭhin.

Mizoram University vice chancellor Prof. KRS Sambasiva Rao chuan, Covid-19 léng vanga buaina karah United Nations SDGs hnuaia International THE Rankings-ah MZU a lang leh category pasarihah ranking-a an lang theih chu lawmawm a tih thu a sawi.

Prof. KRS Sambasiva Rao chuan, "Zirtirtu te, zirlaite leh thawktu dangte châwl loa an thawh ṭhinna leh hmun hrang hranga kan thawhpuite zara hetiang hi thleng thei kan ni. MZU tan leh Mizoram tan hun chhinchhiahtlak a ni," a ti.

International THE Rankings-a MZU a lan pual hian April 21, Nilaini khan MZU Vice-Chancellor, Registrar, Finance Officer, Controller of Examinations, statutory officer-te leh ranking incharge Prof. Diwakar Tiwari, Constituent Campus Principal, dean-te leh administrative office-a thawkte chuan hun tawitê an hmang a ni. Mizoram University hi sorkar laipui hnuaia National Institutional Ranking Framework (NIRF), June 2020-a a tihchhuahah 67-na a ni mek bawk.