April thlaa mi tur Covid vaccine Dose 1,50,000 a thleng tawh

Kumin April thla chhunga Covid-19 laka invènna damdawi (vaccine) second dose dawng tur leh voter ID behchhana vaccine dawng tur chhinchhiah tawh kum 45 chung lamte tana Mizoramin vaccine dose 2,00,000 a chah aṭangin dose 1,50,000 a lo thleng tawh.

State immunization officer Dr Lalzawmi chuan, Covid vaccine dawn tharte chu district hrang hrangah an thawn chhuah tawh thu Vanglaini a hrilh a, "Tuna kan la dawn loh 50,000 pawh kan neih sa kan pek zawh hunah a lo thlen mai kan beisei," a ti.

Vaccine la kim tawh zinga Covid-19 vei leh an awm zauh zauh chungchanga Vanglaini palai zawhna chhangin Covid-19 state nodal officer Dr Pachuau Lalmalsawma chuan, vaccine lâk vangin a kài theih tawh loh tihna a nih loh thu a sawi a, "Dose la kim pawhin an kài leh theih bakah, mi dang pawh an la kài thei. Vaccine hi Covid-19 hri kài tawh lohna a ni lo," a ti a, fimkhur reng a ngaih thu a sawi.

Dr Pachuau Lalmalsawma chuan, vaccine lâk a pawimawh thu sawiin, "Vaccine la tawhte chuan Covid-19 kai leh mah se, vaccine la lote aiin an taksaah Covid hriin hna a thawh dan a nêp a, a thawk na lo deuha hriat a ni. Chuvangin, vaccine lak leh fimkhur hi a pawimawh hle," a ti.