Covid-19 positive-te enkawlna SRH-ZMC leh BSUP CCC a khat

Health minister Dr R Lalthang­liana hoin nimin chhun khan Secretariat conference hall-ah Covid care centre (CCC) leh community quarantine centre (CQC) siam belh dan tur sawiho a ni. Covid-Hripui veite enkawlna hmun State Referral Hospital (ZMC) leh Durtlang BSUP CCC-ah khum a khah rih thu an tarlang.

Dr R Lalthangliana chuan, Aizawl district bikah Covid-19 vei mek mi 433 an awm tih sawiin, "Aizawl district hi a sang fál hle. Airport, Vairengte leh state páwn aṭanga rawn luhna dangte check uluk a ngai," a ti a; Covid-19 vei an pun zel avangin enkawlna hmun ngaihtuah belh a ṭul thu a sawi.

Ṭhutkhawmah hian, Covid-19 veite enkawlna hmun SRH-ZMC leh Durtlang BSUP-ah khum a khah rih thu te, chhuak an awm pawhin lût tharin an luah khah leh nghal zel thu an tarlang.

Tunlaia inkhawm leh sikul kal theih rih loh chhungin Covid-19 veite enkawl nan sikul leh biak-in hmunhmate hman theih dan kawng zawn a, a neitute dil an rél a; "Kohhran hmunhmaa Covid damlote enkawl dan turah inràwnkhawmna neih ni se, tia ngenna siam a, heng hmunte hi bawlhhlawh paihna motor luh theihna remchang awm theihna ni se," an ti.

Hripui veite chu a enkawltu doctor-te tan enkawl a awlsam zawk nan hmun hrang hranga tlem tê têa awm loin, hmun khatah tam tham deuha dah khawm a remchan thu tarlan a ni bawk. Kumin 2021 chhunga Covid-19 positive hmuh chhuah zinga 98% chu civil mi an ni a, paramilitary force mi chu 2% chiah an awm. Kumina hripui vei hmuh tawh zinga 71% chu state páwn aṭanga Lengpui Airport kaltlanga rawn lut an ni a, Kanhmun leh Zokhawthar aṭanga rawn lut 3% an awm a ni.

Ṭhutkhawmah hian Covid-19 Medical Operation Team chairman Dr ZR Thiamsanga, MLA, Aizawl mayor Lalrinenga Sailo leh mi pawimawhte an tel.