Covid-19 vei awm tamna vengte tlawh

Health & Family Welfare minister Dr R Lalthangliana chuan nimin zing khan Aizawla Covid-19 vei mek kawl tam zual vengte a tlawh kual a; ṭanpuina a pek bakah, harsatna awmte sutkian dan tur a sawipui.

Health Minister-in a tlawh vengte chu - Kanan Veng, Damveng, Melthum leh Bethlehem Vengte a ni a; local task force office tlawhin, hmai tuamna leh kut silna bakah, duty-te ei leh in senso atan pawisa a pe a ni.

Nimin zinga dinhmun ang chuan, Kanan Vengah Covid-19 vei mek mi 26, ina inkhung lai 50 an awm a; Damvengah hripui vei mek mi 26 leh ina inkhung lai mi 15 an awm. Melthumah Covid-19 positive mek mi 33 leh ina inkhung mek chhungkua 58 an awm a; Bethlehem Vengah hripui vei mek mi 21 leh ina inkhung mek 29 an awm bawk.

Local task force hrang hrang hruaitute chuan, harsatna an neih ber chu duh ang tâwka swab test tih zung zung theih a ni lo leh endikna a khaihlak zeuh ṭhin chu a nih thu Health Minister an hrilh. Minister chuan, viltu (in-charge) doctor lamte ráwn tur leh harsatna awm apiangah inthlahrung loa sawi zel turin a chah a ni.