Mizoramah vawk 1,164 a thi tawh

Mizorama vawk hri lênna hmun 12 zinga hmun parukah nimin khan vawk 45 a thi leh a; heti hian vawk hri African Swine Fever (ASF) vangin Mizoramah vawk 1,164 a thi tawh.

Mizorama ASF vanga vawk thi tamna ber Lungsenah nimin khan thla 3-8 inkar pathum leh thla 8 chung lam pathum, a vaiin vawk paruk a thi a; Lungsenah hian vawk 613 a thi tawh a ni.

Nimin khan Lunglei Electric Vengah vawk paruk, Rahsi Vengah vawk 11, Salem Vengah vawk 15 a thi a; Thinghlun khuaah vawk pakhat, Armed Vengah vawk paruk a thi bawk.

Animal Husbandry & Veterinary department tarlan danin, infected area ni loah thih dan pangngai loa vawk thi 95 a awm a, an thih chhan hriat a la ni lo. Infected area páwn lama vawk thihnate chu - Chawngte-ah vawk 80, Durtlangah vawk 10 leh Serchhipah vawk panga a ni.